Тошкент вилоятида ҳайдовчилик Андижон вилоятида қишлоқ хўжалиги техника воситаларини бошқариш ҳуқуқини берувчи гувоҳномани қисқа муддатда олиб беришни ваъда қилиб, фуқаролардан пул сўраганлар қўлга тушди, дея хабар қилмоқда Бош прокуратура ҳузуридаги Иқтисодий жиноятларга қарши курашиш департаменти.
Бош прокуратура ҳузуридаги департаментнинг Андижон тумани бўлими томонидан ўтказилган тезкор тадбирда фуқаро Ш.Б. фуқаро Н.ни алдаб, унга ўзининг Қўрғонтепа туман ЙҲХБда ишловчи танишлари орқали қисқа муддатда ўқишга бормасдан ҳайдовчилик гувоҳномасини олиб беришни ваъда қилиб, эвазига 5 миллион сўмни олган вақтида ашёвий далиллар билан ушланган.
Худди шундай ҳолат департаментнинг Ўрта Чирчиқ туман бўлими томонидан ўтказилган тезкор тадбирда фуқаро Б.М. фуқаро А.дан унга қишлоқ хўжалиги техника воситаларини бошқариш ҳуқуқини берувчи гувоҳномани ўқув курсларида қатнашмасдан туриб, гўёки ўзининг «Агроинспекция»да ишловчи таниши орқали олиб бериш эвазига 2,3 млн сўмни фирибгарлик йўли билан олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал Тошкентда 900 долларга «права»ни имтиҳонсиз олиб бермоқчи бўлган шахслар, Самарқандда дарсларга қатнашмасдан, 20 кунда «права» олиб беришни ваъда қилган хусусий мактаб раҳбари ҳамда Наманган ва Қорақалпоғистонда фуқароларга қисқа муддатда ҳайдовчилик гувоҳномаларини олиб беришни ваъда қилган шахслар ушлангани ҳақида хабар берилганди.
Изоҳ (0)