Сурхондарё вилояти Узун туманида фуқаронинг дипломини нострификация қилиб бермоқчи бўлган фирибгар ушланди, дея хабар қилмоқда Бош прокуратура ҳузуридаги Иқтисодий жиноятларга қарши курашиш департаменти.
Бош прокуратура ҳузуридаги департамент ҳамда ДХХнинг Узун тумани бўлимлари томонидан ўтказилган тезкор тадбирда фуқаро А.Н. бошқа бир фуқаро М.нинг ишончига кириб, унинг Тожикистондаги педагогика университетини тугатгани ҳақидаги дипломини гўёки С. исмли таниши орқали нострификация қилиб беришни ваъда қилган.
Эвазига олдиндан келишилган 1 100 АҚШ доллари ва 6,5 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) жиноят иши қўзғатилиб, тергов ҳаракатлари ўтказилмоқда.
Изоҳ (0)