Британия ташқи ишлар вазири Лиз Трасснинг таъкидлашича, барча нарса Россиянинг Украинага бостириб киришни режалаштираётганига ишора қилмоқда. У Welt газетасига берган интервьюсида Лондон ҳужум амалга оширилгудек бўлса, Россияга нисбатан «қаттиқ санкциялар»ни жорий этишни Европа Иттифоқи ва G7 давлатлари билан келишиб олганини маълум қилган.
Трасснинг айтишича, Донбассда содир бўлаётган воқеаларнинг барчаси «жуда хавотирли». Унинг сўзларига кўра, «бу катта эҳтимол билан Россиянинг ҳужум қилишига олиб келади». «Ён босишлар Россияни ҳужумдан тўхтатиб қолмайди. Биз Украинани қўллаб-қувватлаш орқали кучимизни кўрсатишимиз керак. Фавқулодда вазият юзага келган тақдирда биз қаттиқ санкциялар пакети мавжудлигини таъминлашимиз лозим. Ушбу санкцияларни ҳозирда G7 ва ЙИдаги иттифоқчиларимиз, жумладан, Германия билан ҳам келишиб олганмиз», — дейди вазир.
АҚШ президенти Жо Байден 19 февраль куни Россия яқин кунларда Украинага, жумладан, Киевга ҳужум қилиш учун тайёрланаётганини маълум қилди. Унинг қайд этишича, разведка маълумотлари буни тасдиқламоқда. Шу билан бирга, Байден АҚШ ҳарбийларини Украинага юборишга режалаштирмаётганини айтган.
Аввалроқ Донбасс Халқ Республикаси одамларнинг Россияга эвакуация қилиниши ҳақида хабар берганди. ДХР раҳбари Денис Пушилин биринчи навбатда аёллар, болалар ва кекса кишилар олиб кетилишини билдирган. Унинг сўзларига кўра, эвакуация қилинганлар Ростов вилоятига жойлаштирилади, у ерда одамларга барча зарур шарт-шароитлар яратилади. Украина разведкаси маълумотларига кўра, Россия махсус хизматлари Донецкдаги объектларни миналаштирмоқда.
Изоҳ (0)