Тошкентда ўлдирилган қашқадарёлик жаҳон чемпиони Камолиддин Расулов ўлими юзасидан бошланган суд иши қисқа танаффусдан сўнг, 18 февраль куни соат 14:30 да ўз ишини давом эттирди, дея хабар берди «Дарё» мухбири.
Жиноят ишлари бўйича Учтепа туман суди биносида давом этган суд мажлисида дастлаб марҳумнинг беваси, қонуний вакили Гулноза Холмуродова тингланди.
«Турмуш ўртоғим ўлдирилган куни кундузи соат 10-11 ларда у киши спорт залга кетганди. Кейин менга қўнғироқ қилиб, айланишга чиқишимизни айтди ва мени ҳам олиб кетди. Машинада бирга юрганимизда Камолиддин акамга телефон бўлди. Кейин билсам, у айбланувчи экан. Камолиддин акамни чақиришган экан. Кейин биз айтилган манзилга бордик. Камолиддин акам машинадан тушаётганда беш дақиқада ортига қайтишини айтди. Сўнгра айбланувчининг олдига бориб, у билан кўришди. Улар менга яқин туришганди. Мен машинанинг олд ўриндиғида бўлганим боис улар менга аниқ кўринди. Шунда айбланувчи бир менга, бир Камолиддин акамга қараб, безовталангандек кўринди. Кейин мен ноқулай бўлмасин, деб қолаверса, аёл киши бўлганим боис эътибор бермаслик мақсадида телефонимни титкилаб ўтирдим. Орадан нечадир сония ҳам ўтмасдан Камолиддин акам бақириб юборди. Қарасам, айбланувчи Камолиддин акамга пичоқ уриб, суғуриб олаётганди. Акаси эса Камолиддин акамнинг қўлидан ушлаб, айбланувчига қулай имконият яратиб берганди», — дейди марҳумнинг беваси Гулноза Холмуродова.
Гулноза Холмуродова айбланувчининг акаси воқеа жойида қандай пайдо бўлиб қолганига аниқлик киритар экан, турмуш ўртоғи билан айтилган манзилга борганида уларни кутиб турган айбланувчи икки марта телефон қўнғироғига жавоб бермаганини, учинчи қўнғироқда эса ким биландир гаплашаётганини, яъни иккинчи алоқага жавоб бераётгани маълум бўлганини айтиб, «бу пайтда у акасига телефон қилиб, уни чақирган бўлган. Ака-укалар турмуш ўртоғимни ўлдиришни аввалдан режа қилган», — деди.
Суд залига гувоҳ сифатида чақирилган айбланувчининг акаси Я.Т. эса укаси билан Тошкент шаҳрига бетоб укасини даволатиш мақсадида келганини, воқеа содир бўлган куни 2021 йилнинг 13 сентябрда укаси билан уйидан 10-15 дақиқа фарқ билан чиққанини айтди.
Гувоҳ аканинг айтишича, у укасини излаб кўчага чиққан. Сўнгра «дом» тагида уларни кутиб турган ҳайдовчидан укаси қаерга кетганини сўраб, унинг ортидан борган. Воқеа жойига борганда эса бақир-чақирларга гувоҳ бўлган.
Гувоҳни тинглаган судья у кўрган ва эшитган бақир-чақир айнан нимадан иборатлигига аниқлик киритишни сўради. Аммо тайинли жавоб ололмади.
«Мен ўша куни воқеа содир бўлганидан сўнг ўзимни йўқотиб қўйдим. Қорнидан пичоқ суғуриб олинган Камолиддин акамнинг қочиб кетаётганини кўриб, хайрият тирик экан, деган хаёл ўтди. Шундан сўнг жон ҳолатда бақириб, атрофдагилардан ёрдам сўрадим. Кимдир ёрдам берармикан деб, йиғлаб ёрдамга чақирдим, аммо ҳеч ким келмади, ҳатто ППХ ходимлари ҳам қараб туришганди. Ишоняпсизми, ҳеч ким ёрдам бермади. Айбланувчининг акаси воқеа жойига келиб, Камолиддин акамнинг қўлидан ушлаганини, ёрдам бермоқчи экани билан изоҳлаяпти. Аммо нега Камолиддин акам пичоқланиб, бекатда қонга беланиб ётганида ёрдамга келмади», — дейди марҳумнинг беваси.
Гулноза Холмуродова марҳум турмуш ўртоғининг пичоқланиши ҳақида айтар экан, воқеа ўша ердаги кузатув камерасига тушганини, бу ҳақда тергов жараёнида ҳам айтганини билдириб: «Ҳурматли судья, илтимос, ўша кузатув камераларни ҳам кўздан кечиринг», — деди.
Эслатиб ўтамиз, «Дарё»да 2021 йилнинг 13 сентябрь куни соат 21:30 да Тошкент шаҳрининг Учтепа туманида самбо бўйича жаҳон чемпиони — Камолиддин Расулов бошқа бир спортчи томонидан пичоқлаб ўлдирилгани хабар берилганди. Кейинчалик «Менинг юртим» телеканалининг «Марказий студия» кўрсатуви ижодкорлари марҳум ўлимидан аввал пичоқдан жароҳатланган аҳволда икки киши томонидан қувлаб кетилаётганини айтиб, видео ҳам тақдим этганди.
Изоҳ (0)