Шавкат Мирзиёев 17 февраль куни божхона тизимини ислоҳ қилишга бағишланган йиғилишда чегара постларини рақамли ускуналар билан жиҳозлаш юзасидан топшириқ берди.
Давлат раҳбари матбуот котиби Шерзод Асадовнинг хабар беришича, йиғилишда соҳада қилинадиган ишлар ҳали кўплиги қайд этилди. Президент имзолаган қонунга кўра, божхона органларининг ваколатлари кенгаяди.
80 фоиз товар кириб келадиган 22 та асосий постни 3D-сканер, рентген аппарати, видеокузатув камераси, сервер, транспорт тарозиси каби ускуналар билан жиҳозлаш топшириғи берилди. Ушбу мақсадлар учун 370 миллиард сўм йўналтирилади.
Бундан ташқари, темир йўл орқали келадиган товарлар бўйича маълумотларнинг электрон алмашинувини йўлга қўйиш вазифаси берилган. Тегишли мутасаддиларга халқаро жўнатмалар бўйича ахборот алмашиш тизимини жорий этиш топширилган.
Шунингдек, давлат раҳбари божхона тизимида «коррупциядан холи» дастурини амалга ошириш соҳа раҳбарларининг энг устувор вазифаси бўлиши шартлигини кўрсатиб ўтган.
Топшириққа кўра, соҳада замонавий комплаенс тизими жорий қилинади. Бунда:
- 1 майдан бошлаб юк декларациясини расмийлаштириш постлардан чиқарилади ва тадбиркор билан бевосита мулоқотсиз, масофавий амалга оширилади;
- 1 июлдан товарлар коди ва қийматини белгилаш, божхона кўригини ўтказиш, имтиёзли декларация расмийлаштиришда коррупцион хавфлар автоматлашган тизим орқали аниқланади;
- 1 сентябрдан бошлаб барча электрон божхона хизматлари «ягона дарча» тизими орқали кўрсатилади;
- йил якунига қадар божхона кўриги жараёнларини тўлиқ қамраб олган электрон тизим ишга туширилади.
Изоҳ (0)