Ўзбекистонда рақамли валютани босқичма-босқич ишлаб чиқиш ва синовдан ўтказиш ишларини бошлаш режалаштирилган. Бу ҳақда Марказий банк раҳбари Мамаризо Нурмуродов «ПЛАС» журналига маълум қилди.
Унинг сўзларига кўра, бундан аввал халқаро экспертлар иштирокида илмий тадқиқот олиб борилади.
Бундан ташқари, келгусида халқаро очиқ банкинг амалиётини ўрганиб чиқиш кўзда тутилмоқда. Мамаризо Нурмуродовнинг таъкидлашича, буларнинг барчаси бозор тенденцияларидан келиб чиққан ҳолда амалга оширилади.
Рақамли валюта ўзи нима?
Бу муқобил ёки қўшимча валюта сифатида фойдаланиладиган электрон пуллардир. Кўпинча уларнинг баҳоси миллий валюта қийматига боғлиқ бўлади.
Хитой, Япония, Эквадор, Нидерландия, Қозоғистон, Россия каби давлат ҳукуматлари ёки марказий банклари ўзининг миллий рақамли валютасини жорий қилиш ҳақидаги режалари ҳақида маълум қилган.
Виртуал иқтисодиётдаги (масалан, онлайн ўйинлар) валюталардан фарқли ўлароқ рақамли валюталар реал товарлар ва хизматларни тўғридан-тўғри сотиб олишда фойдаланилади.
Шунга қарамай, виртуал валюталар атамаси ҳам рақамли валюталарга синоним сифатида қўлланилади.
Аввалроқ ўзбек сўми биринчи маротаба ўзининг расмий график белгисига эга бўлиши ҳақида хабар берилган эди.
Изоҳ (0)