Бухоро вилояти Когон туманида гаровда турган мулкларни сотиб юборган МЧЖ раҳбари ва собиқ банк ходими ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Бухоро вилояти бошқармаси томонидан АТБ «Микрокредитбанк»нинг Когон банк хизматлари марказининг мурожаатига асосан терговга қадар текширув ўтказилган. Унда марказнинг собиқ мутахассиси М.К. яқин қариндоши М. билан ўзаро тил бириктириб, М.М. МЧЖга берилган кредит эвазига гаровга қўйилган 789,4 миллион сўмлик мулкларни сохта ҳужжатлар тайёрлаш орқали тақиқдан ечишга эришиб, сотиб юборгани аниқланган. Шунингдек, банк ходимлари МЧЖга ажратилган кредит маблағини қайтариш чораларини кўрмаган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 207-моддаси (мансабга совуққонлик билан қараш), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) ва 233-моддаси (банд солинган мулкни қонунга хилоф равишда тасарруф этиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)