Ижтимоий тармоқларда Қашқадарё вилояти Яккабоғ туманида йўл-патруль хизмати ходимлари ва фуқаролар ўртасида тортишув юзага келгани акс этган видеолавҳа тарқалди. Йўл ҳаракати хавфсизлиги хизмати ҳолатга муносабат билдирди.
Қайд этилишича, 15 февраль куни соат 09:30 ларда Яккабоғ тумани Амир Темур кўчасида хизмат олиб бораётган ЙПХ ходими Б.Каримов томонидан Nexia-3 автомобили ҳайдовчисига хавфсизлик камаридан фойдаланмагани учун тўхташ ишораси кўрсатилган. Ҳайдовчи ишорага бўйсунмасдан ҳаракатда давом этган. Кўрилган чоралар натижасида ҳайдовчи тўхтатилган.
ЙПХ ходимлари томонидан қоидабузарлиги бўйича тушунтиришлар берилишига қарамасдан, ҳайдовчи инспекторларга фаол қаршилик кўрсатиб атрофдагиларнинг ҳам эътиборини мазкур вазиятга жалб этган. Жараён давомида атрофда бўлган айрим фуқаролар ЙПХ ходимларининг ўз хизмат фаолиятини бажаришига халақит берган.
Ҳайдовчига нисбатан ЙПХ ходимлари томонидан Маъмурий жавобгарлик тўғрисидаги кодекснинг 125-моддаси (транспорт воситаларидан фойдаланиш қоидаларини бузиш) 1-қисми, 194 (ички ишлар органлари ходимининг қонуний талабларини бажармаслик) ҳамда 195-моддалари (ички ишлар органлари ходимларининг ўз хизмат бурчларини бажаришларига қаршилик кўрсатиш) тартибида маъмурий баённома расмийлаштирилган. Шунингдек, атрофда бўлган, ходимларнинг ўз хизмат фаолиятини бажаришига халақит берган фуқаролар юзасидан ҳам суриштирув олиб борилиб, тўпланган ҳужжатлар ўрганиб чиқишлик учун жиноят ишлари бўйича Яккабоғ тумани судига юборилиши чоралари кўрилмоқда.
Мавзуга доир:
- Тошкентда бир гуруҳ ИИБ ходимлари фуқароларга куч ишлатгани айтилган хабарга изоҳ берилди
- Тошкентда бир гуруҳ ППХ ходимлари фуқарони куч билан хизмат машинасига ўтқазишга уринаётгани акс этган видео бўйича расмий маълумот берилди
- Тошкентда ҳайдовчи ва ЙПХ ходимлари ўртасида жанжал акс этган видеога изоҳ берилди
Изоҳ (0)