Тошкентнинг Юнусобод тумани ҳудудидаги дарахтлар ости бетонланишига йўл қўйилгани ҳолати юзасидан туман прокуратураси томонидан жиноят иши қўзғатилди, деб хабар беради Бош прокуратура матбуот хизмати.
Маълум қилинишича, ҳолат юзасидан терговга қадар текширув ҳаракатлари ўтказилиб, натижасига кўра, Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 3-қисми билан жиноят иши қўзғатилган.
Аниқланишича, 2021 йил 14 декабрь куни соат тахминан 03:00 дан 07:00 га қадар бўлган вақт оралиғида Юнусобод тумани Амир Темур ва Чинобод кўчалари кесишувида жойлашган 1-уйнинг ёнидаги 1,5 сотих ер майдонидаги дарахтларнинг пастки қисмлари номаълум шахслар томонидан кесилиб, жами 10 дона «Элдор қарағайи» дарахтларига шикаст етказилган. Натижада ўсимлик дунёсига 83,16 миллион сўмлик зарар келтирилган.
Бундан ташқари, 2022 йилнинг 3 февраль куни номаълум шахслар томонидан мазкур ер участкасидаги «Элдор қарағайи» дарахтларининг таги бетонлангани аниқланган. Кейинроқ ҳуқуқ-тартибот органлари томонидан мазкур ҳудудда кун-у тун навбатчилик ташкил этилиши маълум қилинганди.
«Ҳозирда ушбу жиноят иши юзасидан Юнусобод туман ИИО ФМБ тергов бўлими томонидан дастлабки тергов ҳаракатлари олиб борилмоқда. Натижаси ҳақида қўшимча маълум қилиниши таъминланади», — дейилади хабарда.
Аввалроқ Жаҳонгир Ортиқхўжаев Тошкентда дарахтлар кесилишида ҳокимликнинг ҳам айби борлигини тан олгани, Тошкентда 81 та дарахтнинг кесилишига оид тергов иши қайта тиклангани тўғрисида хабар берилганди.
Изоҳ (0)