Таълим сифатини назорат қилиш давлат инспекцияси дипломлари тўғридан-тўғри (махсус синовларсиз) тан олинадиган хорижий ОТМлар рўйхатини тасдиқлади.
Таълим сифатини назорат қилиш давлат инспекцияси ҳамда Олий ва ўрта махсус таълим вазирлигининг 2022 йил 14 февралдаги 01/ққ ва 6-қ/қ -сонли қўшма қарори билан халқаро тан олинган Quacquarelli Symonds World University Rankings, Times Nigher Education, Academic Ranking of World Universities ташкилотлари томонидан эълон қилинган олий таълим муассасалари рейтингида биринчи 1000 талик рўйхатига киритилган олий таълим муассасаларининг 2022 йил учун рўйхати тасдиқланди.
Қайд этилишича, Вазирлар Маҳкамасининг 2019 йил 24 июндаги «Хорижий давлатларда таълим олганлик тўғрисидаги ҳужжатларни тан олиш тартибини такомиллаштириш ҳақида»ги 620-сон қарорига мувофиқ, ушбу рўйхатга киритилган, яъни халқаро эътироф этилган ташкилотларнинг (QS, THE, ARWU) рейтингида биринчи 1000 талик рўйхатидан жой олган хорижий олий таълим муассасаларида олинган дипломлар тўғридан-тўғри (махсус синовларсиз) тан олинади.
Аввалроқ ижтимоий тармоқларда Олий ва ўрта махсус таълим вазирлиги номидан хориждан ўқишини кўчирмоқчи бўлган талабалар ҳеч қандай имтиҳонларсиз ўқишини Ўзбекистонга кўчиришга рухсат берилиши ва кўчириш учун барча ҳужжатлар 15 февралгача қабул қилиниши тўғрисида хабарлар тарқалганди. Кейинроқ вазирлик бунинг ёлғон эканини тўғрисида муносабат билдирган эди.
Изоҳ (0)