Yunusobodda daraxtlar tagi betonlab tashlangani yuzasidan jinoyat ishi qo‘zg‘atildi

Toshkentning Yunusobod tumani hududidagi daraxtlar osti betonlanishiga yo‘l qo‘yilgani holati yuzasidan tuman prokuraturasi tomonidan jinoyat ishi qo‘zg‘atildi, deb xabar beradi Bosh prokuratura matbuot xizmati.

Ma’lum qilinishicha, holat yuzasidan tergovga qadar tekshiruv harakatlari o‘tkazilib, natijasiga ko‘ra, Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 3-qismi bilan jinoyat ishi qo‘zg‘atilgan.

Aniqlanishicha, 2021-yil 14-dekabr kuni soat taxminan 03:00 dan 07:00 ga qadar bo‘lgan vaqt oralig‘ida Yunusobod tumani Amir Temur va Chinobod ko‘chalari kesishuvida joylashgan 1-uyning yonidagi 1,5 sotix yer maydonidagi daraxtlarning pastki qismlari noma’lum shaxslar tomonidan kesilib, jami 10 dona “Eldor qarag‘ayi” daraxtlariga shikast yetkazilgan. Natijada o‘simlik dunyosiga 83,16 million so‘mlik zarar keltirilgan.

Bundan tashqari, 2022-yilning 3-fevral kuni noma’lum shaxslar tomonidan mazkur yer uchastkasidagi “Eldor qarag‘ayi” daraxtlarining tagi betonlangani aniqlangan. Keyinroq huquq-tartibot organlari tomonidan mazkur hududda kun-u tun navbatchilik tashkil etilishi ma’lum qilingandi.

“Hozirda ushbu jinoyat ishi yuzasidan Yunusobod tuman IIO FMB tergov bo‘limi tomonidan dastlabki tergov harakatlari olib borilmoqda. Natijasi haqida qo‘shimcha ma’lum qilinishi ta’minlanadi”, — deyiladi xabarda.

Avvalroq Jahongir Ortiqxo‘jayev Toshkentda daraxtlar kesilishida hokimlikning ham aybi borligini tan olgani, Toshkentda 81 ta daraxtning kesilishiga oid tergov ishi qayta tiklangani to‘g‘risida xabar berilgandi.