Тошкент шаҳри Сергели туманида 11 февраль куни ИИБ ходими ёнғин бўлаётган ҳудуддан фуқарони олиб чиқиб кетди. Бу ҳақда шаҳар Ички ишлар бош бошқармаси хабар қилди.
Қайд этилишича, профилактика катта инспектори капитан Жамшид Тошкенбоев ёрдамчиси Қудратилло Мирзарайимов билан бирга «Қипчоқ» маҳалласини кўздан кечираётган пайтда профилактика инспекторининг телефонига маҳалладаги уйлардан бирида яшовчи фуқаро қўнғироқ қилиб, уйида ёнғин юзага келганини, ёнаётган хонадондан аёл киши борлигини айтган.
Капитан шу заҳоти айтилган манзилга етиб борган. У эшикни очганида касаллиги туфайли ҳаракатланиши қийин бўлган аёл ҳушини йўқотишига оз қолганини кўрган. Аёл тоза ҳавога олиб чиқилиб, тез ёрдам етиб келгунига қадар унга биринчи ёрдам кўрсатилган.
Профилактика инспекторининг ҳаракатлари сабабли кўп қаватли уйда ёнғин тарқаш хавфининг олди олинган.
Мавзуга доир:
Изоҳ (0)