Техас бош прокурори биометрик маълумотлар соҳасидаги ҳуқуқбузарликлар туфайли Meta Platforms компанияси (Facebook эгаси) устидан судга даъво киритди, деб хабар беради Deutsche Welle.
Прокурор Кен Пакстоннинг Twitter’даги саҳифасида эълон қилинган баёнотда таъкидланишича, миллионлаб техасликларнинг биометрик маълумотлари уларнинг тегишли розилигисиз тўпланган, бу эса Техас қонунларига зид ҳисобланади.
«Facebook эндиликда инсонларнинг хавфсизлиги ва фаровонлиги ҳисобига фойда олиш мақсадида одамлар ҳамда уларнинг фарзандларидан ўз манфаатлари йўлида фойдаланмайди. Бу Big Tech’нинг алдамчи бизнес амалиётларига яна бир мисолидир ва улар тўхтатилиши керак. Мен техасликларнинг хавфсизлиги ва маълумотларининг махфий қолиши учун курашишда давом этаман», — дейди Пакстон.
Гап шундаки, суратларда пайдо бўладиган одамларни автоматик равишда қайд этадиган юзни таниш функцияси 2021 йил охирида бекор қилинган. Бироқ Пакстоннинг маълум қилишича, Facebook ижтимоий тармоқ платформасига юкланган суратлар ва видеолардаги миллионлаб биометрик маълумотларни сақлаб қолган.
«Меtа ва Facebook ўз империясини ривожлантириш ва тарихий даромад олиш учун фойдаланувчиларнинг шахсий маълумотларидан кўп бора фойдаланиб келган», — дейди прокурор.
Меtа компанияси вакили айбловларда келтирилган маълумотлар асоссиз дея жавоб қайтарган.
Эслатиб ўтамиз, 2020 йили Иллинойс штати томонидан киритилган шу каби даъво сабаб Facebook 550 миллион долларлик келишувни амалга оширганди. 2015 йилда Иллинойс штати аҳолиси Facebook’ни юзни таниш технологияси биометрик маълумотларни тўплашда айблаб, коллектив даъво киритган эди. 2019 йилнинг августида АҚШ федерал апелляция суди Facebook’нинг жамоавий даъвога эътироз билдиришга уринишини рад этганди.
Изоҳ (0)