«Асакабанк»нинг 2 нафар ходими қидирувга берилди. Улар давлатга 504 минг доллар зарар етказган

«Асакабанк» АЖ манфаатларига ярим миллион доллардан ортиқ зарар етказган икки нафар банк ходимига қидирув эълон қилинди, деб хабар беради ЎзА.

Маълум қилинишича, «Асакабанк» АЖ Бухоро вилояти филиали собиқ бошқарувчиси Муродов, кредитлаш бўлими бошлиғи Ёдгоров, «Асакабанк» АЖнинг бош офиси Ички аудит хизмати бошлиғи Идиев маблағларни талон-торож қилгани аниқланган.

Хусусан, улар Осиё тараққиёт банки маблағлари ҳисобидан молиялаштирилган 2 миллион доллар миқдоридаги имтиёзли кредитни қўлга киритиш мақсадида «Гранд Бухара Агро» МЧЖ раҳбари Бахронов, «Кафил суғурта» МЧЖнинг Бухоро филиали мудири Абдураҳмонов билан ўзаро жиноий тил бириктирган.

Натижада хорижий валюта асл нархидан икки баравар қимматга келишилган иссиқхона мажмуасини сотиб олишга йўналтирилган. Кредит қайтарилишини таъминотсиз қолдириб, давлат ва банк манфаатларига 503 минг АҚШ доллари миқдорида зарар етказилган.

Ҳозирда банк собиқ бошқарувчиси Муродов ва бош офис Ички аудит хизмати бошлиғи Идиевларга қидирув эълон қилинган. Жиноий гуруҳнинг қолган аъзолари суд олдида жавоб бермоқда.

Аввалроқ Жиззахда 350 млн сўм кредит маблағини талон-торож қилган корхона раҳбари аниқлангани, «Халқ банки»нинг Андижон вилояти Амалиёт бўлими ходимлари 4,6 млрд сўмни ўзлаштиргани, Хоразмда 10 млн сўм пора олган бандликка кўмаклашиш маркази директори 5 йилга қамалгани тўғрисида хабар берилганди.