“Asakabank” AJ manfaatlariga yarim million dollardan ortiq zarar yetkazgan ikki nafar bank xodimiga qidiruv e’lon qilindi, deb xabar beradi O‘zA.
Ma’lum qilinishicha, “Asakabank” AJ Buxoro viloyati filiali sobiq boshqaruvchisi Murodov, kreditlash bo‘limi boshlig‘i Yodgorov, “Asakabank” AJning bosh ofisi Ichki audit xizmati boshlig‘i Idiyev mablag‘larni talon-toroj qilgani aniqlangan.
Xususan, ular Osiyo taraqqiyot banki mablag‘lari hisobidan moliyalashtirilgan 2 million dollar miqdoridagi imtiyozli kreditni qo‘lga kiritish maqsadida “Grand Buxara Agro” MChJ rahbari Baxronov, “Kafil sug‘urta” MChJning Buxoro filiali mudiri Abdurahmonov bilan o‘zaro jinoiy til biriktirgan.
Natijada xorijiy valyuta asl narxidan ikki baravar qimmatga kelishilgan issiqxona majmuasini sotib olishga yo‘naltirilgan. Kredit qaytarilishini ta’minotsiz qoldirib, davlat va bank manfaatlariga 503 ming AQSh dollari miqdorida zarar yetkazilgan.
Hozirda bank sobiq boshqaruvchisi Murodov va bosh ofis Ichki audit xizmati boshlig‘i Idiyevlarga qidiruv e’lon qilingan. Jinoiy guruhning qolgan a’zolari sud oldida javob bermoqda.
Avvalroq Jizzaxda 350 mln so‘m kredit mablag‘ini talon-toroj qilgan korxona rahbari aniqlangani, “Xalq banki”ning Andijon viloyati Amaliyot bo‘limi xodimlari 4,6 mlrd so‘mni o‘zlashtirgani, Xorazmda 10 mln so‘m pora olgan bandlikka ko‘maklashish markazi direktori 5 yilga qamalgani to‘g‘risida xabar berilgandi.
Izoh (0)