«Россия Украинага айнан қайси санада ҳужум бошлашини олдиндан айтолмаймиз», — Байденнинг ёрдамчиси

АҚШ расмийлари Россия келаси ҳафтанинг исталган куни Украинага бостириб кириши мумкин, деб ҳисоблайди, аммо ҳужумнинг аниқ санасини билмайди. Бу ҳақда CNN телеканалида АҚШ президентининг миллий хавфсизлик бўйича маслаҳатчиси Жейк Салливан айтиб ўтди.

«Аниқ санани башорат қила олмаймиз, лекин аввал айтиб ўтганимиздек, биз Россиянинг Украинадаги кенг миқёсли ҳарбий амалиётлари исталган вақтда бошланиши мумкин бўлган вақт оралиғида турибмиз», — деди Салливан ҳужум 16 февралда бошланадими, деган саволга жавобан.

Аввалроқ Politico манбалари айнан 16 февраль санасини АҚШ президенти Жо Байден НАТОдаги иттифоқчиларига Россия агрессияси бошланишининг норасмий санаси сифатида кўрсатгани ҳақида хабар берганди.

Салливаннинг сўзларига кўра, Украина атрофидаги можаронинг кучайиши Пекин Олимпиадаси якунига қадар ҳам, ундан кейин ҳам содир бўлиши мумкин (ўйинлар 20 февралда тугайди). Бундан ташқари, Байденнинг маслаҳатчиси Россия дипломатик йўлни танлаши мумкинлигини ҳам тахмин қилди. Унинг қўшимча қилишича, АҚШ ўз разведка маълумотларини мазкур эҳтимолий урушни бошлаш учун эмас, балки тўхтатиш учун тарқатмоқда.

11 февраль куни АҚШ Давлат котиби Энтони Блинкен Россия Украинага исталган вақтда ҳужум қилиши мумкинлигини, чунки Америка разведкаси маълумотларига кўра, у ўз чегаралари яқинида етарлича қўшин тўплаганини айтганди. Бунга жавобан Москва Вашингтонни вазиятни ошириб юборгани ва била туриб ёлғон маълумот тарқатгани учун қоралади.