Ўзбекистонда онлайн аукцион орқали бир ҳафтада 7 млрд сўмлик авторақамлар сотилди

«Ўзбекистон республика товар-хом ашё биржаси» 7—13 февраль кунларига мўлжалланган ҳафталик дайжестини эълон қилди.

Қайд этилишича, шу ҳафтада биржанинг барча савдо платформаларида 2 триллион 303 миллиард 4 миллион сўмлик товар сотилган. Бу аввалги ҳафтага нисбатан 16,4 фоизга кўп ҳисобланади. Бунда сотувларнинг:

• 88,6 фоизи биржа савдолари;
• 0,1 фоизи кўргазма-ярмарка савдолари;
• 10,9 фоизи электрон давлат харидлари;
• 0,3 фоизи авторақамларнинг онлайн-аукционига тўғри келган.

Кўриб чиқилаётган давр мобайнида онлайн аукцион орқали 3 минг 530 та авторақамлар сотилган. Сотилган давлат рақам белгиларининг умумий суммаси 7 миллиард сўмни ташкил қилган. Рақобатли савдолар натижасида битимларнинг:

• 5,6 фоизи биринчи тоифадаги авторақамларга;
• 9,6 фоизи иккинчи;
• 8,7 фоизи учинчи;
• 11,9 фоизи тўртинчи;
• 23,2 фоизи бешинчи;
• 41 фоизи олтинчи тоифа авторақамларга тегишли ҳисобланади.

Кўриб чиқилаётган даврда очиқ биржа савдолари орқали жами 2 триллион 41 миллиард 6 миллион сўмлик товар ресурслари сотилган. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган.

Шакар

Биржанинг шакар бозорида нархлар пасайиши қайд этилган. Ҳафта давомида биржа савдоларига 16 минг 391 тонна шакар қўйилган ва улардан 11 минг 231 тоннаси, яъни 68,5 фоиз қисми сотилган. Ўтказилган савдоларда ҳар куни ўртача 66 харидор иштирок этган.

Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 8 миллион 170,2 минг сўмдан 8 миллион 118,4 минг сўмгача, яъни 0,6 фоизга пасайган.

Ўтказилган биржа савдолари натижасида маҳаллий шакарнинг Ц-2 – категорияси бўйича шаклланган ўртача ҳафталик нархи маҳсулотни бир тоннаси учун 8 миллион 196,6 минг сўмни ташкил этган.

Кўмир

Ўтган ҳафтада биржа савдоларида 15 минг 658 тонна кўмир қўйилган. Улардан 10 минг 259 тоннаси, яъни 65,5 фоиз қисми сотилган. Кўмирнинг ўртача кунлик сотув ҳажмлари 2 минг 52 тоннани ташкил қилган.

Кўриб чиқилаётган даврда кўмир бўйича шаклланган кунлик ўртача нархлар маҳсулотнинг бир тоннаси учун 228,1 минг сўмдан 224,7 минг сўмгача пасайган.

Пахта линти

Ўтган ҳафтада биржа савдоларида 2 минг 48 тонна пахта линти сотилган. Ўртача кунлик сотув ҳажмлари 410 тоннани ташкил қилган.

Кўриб чиқилаётган даврда пахта линтининг кунлик ўртача нархлари маҳсулотнинг бир тоннаси учун 4 миллион 516,9 минг сўмдан 3 миллион 500,7 минг сўмгача, яъни 22,5 фоизга пасайган.