Андижонда ўқитувчилар ўқувчилар билими қониқарсизлиги учун ота-оналардан узр сўрашга мажбурлангани эътирозларга сабаб бўлганди. Ҳолат юзасидан Халқ таълими вазири, вилоят ҳокими ва бошқа бир қанча амалдорлар муносабат билдириб, устозлардан узр сўраган ва айбдорлар жазоланиши айтилган. Воқеа ортидан туман ҳокимига ҳайфсан берилган, ҳоким ўринбосари ишдан олинган. Шунингдек, туман ХТБ мудири ва мактаб директори вазифасидан озод қилинган.
Халқ депутатлари Марҳамат туман ва вилоят кенгаши депутатлари 13 февраль куни журналист ва блогерларга мазкур мавзуни ортиқ муҳокама қилмасликни сўрагани акс этган видеомурожаати тарқалди.
Мурожаатда депутат Хафиза Мамаризаева мавзу атрофидаги негатив фикрлар туман аҳолиси руҳиятига салбий таъсир қилаётганини айтган.
«Яхши ниятда бошланган эзгу иш қандай қилиб чаппасига кетганидан ҳайронмиз. Ҳаммамиз келишиб, ижтимоий тармоқларда бўлаётган турли муносабатларга чек қўйишларини сўраб мурожаат қиляпмиз. Чунки бу ҳолат Марҳамат тумани аҳолиси руҳиятига салбий таъсир кўрсатяпти. Биз халқ ичида юрибмиз. Қанақа саволлар бўлса беришсин, биз туман фаоллари жавоб беришга тайёрмиз», — деди у.
Депутат Даврон Мақсудов эса журналист ва блогерлардан мавзу атрофидаги муҳокамаларни бас қилишни сўраган.
«Блогерлар ва журналистлар бу масала муҳокамасини тўхтатишлари керак. Тўғри, йиғилишни ташкил қилишда камчиликлар бўлди. Туман ҳокими, ҳатто вилоят ҳокими узр сўраб чиқди. Ҳамма блогер ва журналистлар сизларни сессияларимизга таклиф қиламиз. Биз депутатларда бир хил фикр бўлмайди. Биз жуда кенг фикрловчи одамлармиз. Ниятимиз битта - Марҳамат туманини олдинга интилишига ҳисса қўшиш, республикада ўрнини топтириш. Блогер ва журналистлар доим «Халқ муаммоларни олиб чиқсак, ижтимоий-иқтисодий масалалар ривожланса», дейди. Кимдир камчиликка йўл қўйди, кимдир узр сўради. Келинглар, туман халқи билан келажакка қараб юрайлик. Ҳадеб орқага қарайверсак, орқага қараб юриб кетиб қоламиз. Камчилик ва қиладиган ишлар жуда кўп», — деди у.
Яна бир депутат Ортиқали Ҳусанов эса жамоатчилик туман ҳокимининг таълимга қаратаётган эътиборини нотўғри тушунганини айтган.
«Ҳоким таълимни ривожлантириш йўлида кўп ишлар қилди. Мен муҳокама қилинаётган мавзу бўйича яхши ташаббусларни нотўғри тушунилган ҳолат деб баҳолаган бўлардим», — деди депутат.
Аввалроқ «Дарё» мухбирининг узрбозлик йиғилиши бўйича ўтказган журналистик суриштируви эълон қилинганди. Материалда йиғилишда иштирок этган директор ҳамда ўқитувчилар ота-оналардан узр сўрагани ва бунга мажбур қилингани айтилган. Ушбу узр сўраш мажлисини ўтказиш шахсан ҳоким томонидан топшириқ сифатида берилгани қайд этилган.
Изоҳ (0)