United World Colleges (UWC) дастури бутун дунё бўйлаб 180 та мамлакатни қамраб олган ва у иқтидорли ўқувчиларга халқаро нуфузли олий ўқув юртидан олдинги таълимни хорижда олиш, шунингдек, ўзи учун янги билимлар, маданият ва дунёқараш уфқларини очиш имкониятини тақдим этади. Жорий йилда ўзбекистонлик ўқувчилар учун илк бор Африка ва Норвегиядаги UWC коллежлари жойлар тақдим этди.
UWC’нинг Ўзбекистондаги Миллий қўмитаси 2019 йилдан бери ERIELL компаниялар гуруҳи ва Enter Engineeringнинг молиявий ва ташкилий кўмагида фаолият юритиб келмоқда.
«Ўзбекистон Президенти ва ҳукумати томонидан ёшларга оид давлат сиёсатини такомиллаштиришга алоҳида эътибор қаратилмоқда ва бизлар учун корпоратив ижтимоий дастуримиз мамлакатнинг умумий тараққиёт йўналиши доирасида эканлиги жуда муҳим. Иқтидорли ва истеъдодли ёшларни қўллаб-қувватлаш — устувор йўналишларимиздан бири», — деди ERIELL Group ва Enter Engineering бошқаруви раиси Бахтиёр Фазилов.
2021 йилда сайтда рекорд натижа қайд этилди, яъни 526 нафар киши рўйхатдан ўтди. Уч босқичдан иборат мураккаб саралаш босқичидан сўнг 4 нафар мактаб ўқувчиси UWC Li Po Chun (Гонконг), UWC Dilijan (Арманистон), UWC East Africa (Танзания) ва UWC Red Cross Nodric (Норвегия) коллежларида ўқишни давом эттириш имкониятига эга бўлди.
«Мен саралаш босқичида иштирок этаётган ўқувчилар сони йилдан йилга ортиб бораётганидан ниҳоятда мамнунман, мамлакатимизнинг энг чекка ҳудудларидан ҳам аризалар келиб тушмоқда. Бизнинг энг иқтидорли болаларни топиш имкониятимиз ҳам тобора ортиб бормоқда. Болалар — бу Янги Ўзбекистоннинг таянчи ва ишончи. Бундай ташаббуслар ёрдамида уларга янги имкониятлар эшигини очиш орқали биз тараққиёт ва рўй бериши муқаррар бўлган ижобий ўзгаришлар учун пойдевор яратаётганимизга ишонаман», — дея қўшимча қилди миллий қўмита раиси, ERIELL ва Enter Engineering бошқаруви раисининг ўринбосари Нигора Ибадова.
Карантин чекловлари сабабли бу йил саралаш босқичи илк бор онлайн режимда ўтказилди. Шунга қарамай, танлов муваққиятли якунланди. Баҳолаш комиссияси таркибидан Ўзбекистон Республикаси Президент таълим муассасалари агентлиги ўқитувчилар малакасини ошириш бўлими бошлиғи Наргиза Кучкарова, Тошкент шаҳридаги Халқаро Вестминстер университети катта ўқитувчиси Эркин Муҳаммедов, Сингапур менежментни ривожлантириш институти катта ўқитувчиси Мурад Исмаилов, UWC Mahindra коллежининг 2001 йилдаги битирувчиси, Тошкент халқаро мактаби ўқитувчиси Наргиза Азизова, шунингдек, ERIELL компаниялар гуруҳи ва Enter Engineering ходимларидан иборат кўнгиллилар жой олди. Миллий қўмита вакиллари билан бир қаторда, баҳолаш комиссияси аъзолари қаторидан халқаро экспертлар, Арманистон ва Италиядаги UWC коллежлари ўқитувчилари ҳам ўрин олди.
«Бугун ўсиб бораётган авлодни ўта нозик ва мунтазам қиёфасини ўзгартираётган дунё хатарларига тайёрлашимиз зарур бўлган пайтда тинчлик йўли билан ривожланиш йўлидаги самарали мулоқотга қаратилган инсонлар ўртасидаги алоқалар устувор аҳамият касб этмоқда. UWC ҳаракатининг бутун дунёдаги миссияси ҳам айни шу мақсадга қаратилган. Биз таълимга тинч ва барқарор келажак йўлида инсонлар, миллатлар ва маданиятларни бирлаштиришга қодир куч сифатида ишонамиз. Саралаш босқичидан ўтган болаларда халқаро коллежларда Ўзбекистон шарафини муносиб ҳимоя қилиш ва келгусида инсонлар ўртасидаги ишонч ва хавфсизликни мустаҳкамлаш сингари умумий мақсадга қўлдан келганча шахсий ҳисса қўшиш имконияти пайдо бўлгани қувонтиради», — деди UWC коллежи вакили Дилижан Нара Саркисова.
Танлов жараёнида баҳолаш комиссияси аъзолари нафақат танлов иштирокчиларининг умумий билимлари, балки уларнинг жамиятдаги ҳозирги кундаги глобал муаммоларига доир қарашларини баҳолади, балки уларнинг мослашувчанлик, топқирлик, танқидий фикрлаш ва бошқа кўплаб шахсий фазилатларини аниқлади.
«Тест синовлари ва суҳбат сингари анъанавий баҳолаш усуллари болаларга ўзларини тўлиқ намоён қилиш имкониятини бермайди. UWC танловининг асосий афзаллиги эса болага турли ракурсдан қараш имконини берувчи ҳар бир баҳолаш воситаси пухта ўйланганидадир. Якуний босқични алоҳида эътироф этишни хоҳлардим, чунки унда иштирокчилар топшириқни симуляциявий ўйин шаклида бажарди. Бу номзодларнинг жамоада ишлаш, қарор қабул қилиш, танқидий ва креатив фикрлаш қобилияти сингари кўникмаларини кўриш имконини берди. Булар эса ўз навбатида 21 асрда муваффақиятга эришишнинг асосий кўникмалари ҳисобланади», — деди Ўзбекистон Республикаси Президент таълим муассасалари агентлиги ўқитувчилар малакасини ошириш бўлими бошлиғи Наргиза Кучкарова.
Маълумот учун
United World Colleges (UWC ) — бу дунёнинг 17 та мамлакатида жойлашган 18 та коллеждан иборат тармоқни бирлаштирувчи нотижорат ташкилоти. UWC’нинг миссияси таълим ва билимларни тинч, барқарор келажак йўлида миллатлар ҳамда маданиятларни бирлаштиришга қодир кучга айлантиришдан иборат. Коллежларда таълим халқаро бакалавриат (IBDP) дастури бўйича олиб борилади. Бугунги кунда UWC тизимида дунёнинг 150 дан ортиқ мамлакатидан 9000 нафардан зиёд талаба таҳсил олмоқда. Фаолият йиллари давомида коллежларни 60 000 нафардан зиёд талаба битирди. UWC’нинг Ўзбекистондаги миллий қўмитаси 2019 йилдан бери ERIELL компаниялар гуруҳи ва Enter Engineeringнинг молиявий ва ташкилий кўмагида фаолият юритиб келмоқда.
Реклама ҳуқуқи асосида.
Изоҳ (0)