«Оташин шоир, таржимон ва драматург Усмон Носир таваллудининг 110 йиллигини кенг нишонлаш тўғрисида»ги президент қарори қабул қилинди. Бу ҳақда Telegram’даги «Ҳуқуқий ахборот» канали хабар қилди.
Қайд этилишича, қарор билан 2022 йилда Усмон Носир таваллудининг 110 йиллигини кенг нишонлаш белгиланган. Бу бўйича ташкилий қўмита таркиби тасдиқланган.
Қарорга кўра, шоир таваллудининг 110 йиллигини кенг нишонлаш бўйича чора-тадбирлар доирасида Усмон Носир ҳаёти ва фаолиятини, хусусан, унинг қатағон даврида кечган йилларини ўрганиш, ҳозирга қадар номаълум бўлиб келаётган қўлёзма асарларининг тақдири ҳақида маълумотлар тўплаш мақсадида ишчи гуруҳ тузилиб, унинг Ички ишлар вазирлиги, Давлат хавфсизлик хизмати, шунингдек, Россия Федерациясидаги тегишли архив материаллари билан танишиши учун шароит яратилади.
Шунингдек, Наманган шаҳрида Усмон Носир ҳайкали ўрнатилади. Тошкент ва Наманган шаҳарларидаги кўчаларга Усмон Носир номи берилади. Умумий ўрта таълим муассасалари, ижод мактаблари ўқувчилари ўртасида Усмон Носир ҳаёти ва ижодига бағишланган «Унутмас мени боғим» мавзусида иншолар танлови ўтказилади.
Маълумот ўрнида, Усмон Носир 1913 йилда Наманганда туғилган. Ижодий фаолияти давомида «Қуёш билан суҳбат», «Сафарбар сатрлар», «Тракторобод», «Юрак», «Меҳрим» номли бир қатор асарлар яратган. 1937 йилнинг 13 июлида Усмон Носир «халқ душмани» тамғаси билан сургун қилинган. Шоир Златоусцк қамоғи, Владивосток, Магадан, Мариинск, Сибир лагерларида сақланган. 1944 йилнинг охирларига келиб Усмон Носир оқланган. Аммо шоир бу вақтга келиб оламдан кўз юмган. У 1944 йилнинг 9 март куни вафот этган, 15 март куни Суслов қишлоғидаги қабристонга дафн этилган.
Изоҳ (0)