Ўзбекистон ҳар йили жаҳон мамлакатларининг демократия индексини эълон қиладиган Британиянинг The Economist Intelligence Unit тадқиқотлар ташкилотининг 2021 йилги рейтингида 150-ўринни эгаллади. Рейтингга жами 167 та мамлакат ҳамда Гонконг ва Фаластин автоном ҳудудлари киритилган.
Рейтинг муаллифларининг фикрича, Ўзбекистонда демократия билан боғлиқ вазият 2020 йилга нисбатан ўзгармаган — мамлакат яна 2,12 балл тўплаган ва «авторитар режимли» давлатлар гуруҳида қолмоқда. Экспертлар сайлов жараёни ва плюрализмни 10 дан 0,08 баллга, ҳукумат фаолиятини — 1,86 баллга, сиёсий иштирокни — 2,78 баллга, сиёсий маданиятни — 5 баллга ва фуқаролик эркинликларини 0,88 баллга баҳолаган. Ўзбекистон рўйхатда 2020 йилга нисбатан бир неча поғона кўтарилган бўлса-да, кўрсаткичлар ўзгармаган.
Шарқий Европа минтақасида (28 та давлат киради) ўтган йилгидек 26-ўринни эгаллаган. Ундан кейинги ўринлари Тожикистон (умумий рейтингда 157-ўрин) ва Туркманистон (162-ўрин) жойлашган. Қозоғистон эса яна 23-ўринни эгаллаган (умумий рейтингда 128-ўрин), Қирғизистон — 21-ўринда (умумийда 115-ўрин).
Рейтингда биринчи ўринни 9,75 балл олган яна Норвегия эгаллаган. Ундан кейинги ўринларда 9,37 балл билан Янги Зеландия ва 9,27 балл билан Финляндия ўрин олган. Кучли бешликка, шунингдек, 9,26 балл билан Швеция ва 9,18 балл билан Исландия ҳам кирди.
2020 йилги рейтингда 1,08 балл билан индекснинг энг қуйи поғонаси эгаллаган Шимолий Корея бу сафар айнан шу каби кўрсаткич билан 165-ўринни эгаллаган, энг охирги ўринни 0,32 балл билан Афғонистон банд этган.
Аввалроқ Буюк Британиянинг The Independent нашри соҳага ихтисослашган журналистларнинг тавсиялари асосида саёҳат қилиш учун энг оммабоп 10 та йўналишни эълон қилган ва улар орасида Ўзбекистон ҳам ўрин олган эди.
Изоҳ (0)