O‘zbekiston jahon pasportlari indeksida uch pog‘ona pastlab, 86-o‘rinni egalladi

O‘zbekiston Henley & Partners kompaniyasi tomonidan tuziladigan Henley Passport Index indeksida 2022-yilning birinchi choragida 3 pog‘ona pastladi va 86-o‘rinni egalladi.

Unga ko‘ra, O‘zbekiston pasporti 2022-yil birinchi choragi bo‘yicha 86-o‘rinni egallagan — u bilan bir qatorda Gabon joylashgan. O‘zbekiston mazkur reytingda uch pog‘ona pastlagan — 2021-yili u 83-o‘rinda edi.

Reyting Xalqaro havo transporti assotsiatsiyasi bergan ma’lumotlar asosida tuzilgan bo‘lib, unda davlatlarning fuqarolik pasporti o‘z egasiga nechta mamlakatga avvaldan viza olmasdan (umuman viza olmasdan yoki yetib borganidan keyin viza olgan holda) kirib borish imkonini berishi inobatga olingan.

Yangilangan reytingga ko‘ra, O‘zbekiston pasportiga ega shaxslar oldindan viza olmagan holda 57 ta mamlakatga borishi mumkin.

Markaziy Osiyo davlatlari orasida Qozog‘iston yetakchilik qilmoqda — reytingning 68-pog‘onasi, Qirg‘iziston — 80, Tojikiston — 84, Turkmaniston esa 91-o‘rinda joylashgan.

Reytingda birinchi o‘rinni Singapur va Yaponiya egallab turibdi. Ular 192 ta davlatga vizasiz borish yoki yetib borgandan keyin viza olish huquqiga ega. Janubiy Koreya 190 ta mamlakat bilan ikkinchi o‘rinni egallab turibdi, uchinchi pog‘onadan esa Ispaniya, Italiya, Lyuksemburg, Finlyandiya o‘rin olgan. Ularning fuqarolari 189 ta davlatga vizasiz borishi yoki yetib borgandan keyin viza olishi mumkin.