O‘zbekiston har yili jahon mamlakatlarining demokratiya indeksini e’lon qiladigan Britaniyaning The Economist Intelligence Unit tadqiqotlar tashkilotining 2021-yilgi reytingida 150-o‘rinni egalladi. Reytingga jami 167 ta mamlakat hamda Gonkong va Falastin avtonom hududlari kiritilgan.
Reyting mualliflarining fikricha, O‘zbekistonda demokratiya bilan bog‘liq vaziyat 2020-yilga nisbatan o‘zgarmagan — mamlakat yana 2,12 ball to‘plagan va “avtoritar rejimli” davlatlar guruhida qolmoqda. Ekspertlar saylov jarayoni va plyuralizmni 10 dan 0,08 ballga, hukumat faoliyatini — 1,86 ballga, siyosiy ishtirokni — 2,78 ballga, siyosiy madaniyatni — 5 ballga va fuqarolik erkinliklarini 0,88 ballga baholagan. O‘zbekiston ro‘yxatda 2020-yilga nisbatan bir necha pog‘ona ko‘tarilgan bo‘lsa-da, ko‘rsatkichlar o‘zgarmagan.
Sharqiy Yevropa mintaqasida (28 ta davlat kiradi) o‘tgan yilgidek 26-o‘rinni egallagan. Undan keyingi o‘rinlari Tojikiston (umumiy reytingda 157-o‘rin) va Turkmaniston (162-o‘rin) joylashgan. Qozog‘iston esa yana 23-o‘rinni egallagan (umumiy reytingda 128-o‘rin), Qirg‘iziston — 21-o‘rinda (umumiyda 115-o‘rin).
Reytingda birinchi o‘rinni 9,75 ball olgan yana Norvegiya egallagan. Undan keyingi o‘rinlarda 9,37 ball bilan Yangi Zelandiya va 9,27 ball bilan Finlyandiya o‘rin olgan. Kuchli beshlikka, shuningdek, 9,26 ball bilan Shvetsiya va 9,18 ball bilan Islandiya ham kirdi.
2020-yilgi reytingda 1,08 ball bilan indeksning eng quyi pog‘onasi egallagan Shimoliy Koreya bu safar aynan shu kabi ko‘rsatkich bilan 165-o‘rinni egallagan, eng oxirgi o‘rinni 0,32 ball bilan Afg‘oniston band etgan.
Avvalroq Buyuk Britaniyaning The Independent nashri sohaga ixtisoslashgan jurnalistlarning tavsiyalari asosida sayohat qilish uchun eng ommabop 10 ta yo‘nalishni e’lon qilgan va ular orasida O‘zbekiston ham o‘rin olgan edi.
Izoh (0)