Ҳар куни юриш керак бўлган ўн минг қадам ҳақида тез-тез эшитамиз. Эҳтимол, организм учун уч минг қадам етарлидир? Grazia нашри буни тушунтиришга ҳаракат қилади.
10 минг қадам юриш назарияси қаердан пайдо бўлган?
Гап 1965 йилларга бориб тақалади. Жуда шов-шувга сабаб бўлган Токио ёзги Олимпиада ўйинларидан бир йил ўтгач, Манпо-кеи қадам ҳисоблагичлари бозорларда пайдо бўла бошлади. Япон тилида бу «10 минг қадам» деган маънони англатади. Умуман олганда, бу кейинчалик турли хил маълумотларга тўлиб кетган маркетинг ҳийласи эди. Ушбу мавзу бўйича бир нечта тадқиқотлар ҳам ўтказилди. 10 000 қадам назариясини Жаҳон соғлиқни сақлаш ташкилоти, Британия Соғлиқни сақлаш вазирлиги ва, албатта, юз ёшдан ошган аҳолисининг кўплиги билан бутун дунёга машҳур мамлакат ҳисобланган Япония халқи ҳам қўллаб-қувватлайди.
10 минг қадам километрларда қанча бўлади?
Албатта, ҳамма нарса индивидуалдир. Баъзиларнинг қадами катта, баъзиларники эса қисқа. Босиб ўтилган масофа ҳам узунликка қараб ўзгаради. Аммо ўртача ҳисобда 10 минг қадам, тахминан, 7-8 километр масофани ташкил қилади.
Бунга қанча вақт кетиши ҳар бир одамнинг ўзига боғлиқ. Масалан, секин юрганда: соатига 4,2 минг — 4,8 минг қадам. Ўртача: соатига 5,4 минг — 6,6 қадам. Тез юргамнда эса — соатига 7,2 мингдан ортиқ қадам ташланади.
Бу қанчалик фойдали?
Россия тиббиёт-техника фанлари академияси академиги, саломатлик бўйича 12 та китоб муаллифи Павел Евдокименко юриш ҳақида шундай дейди: «Юриш жуда фойдали, стресснинг энг яхши давоси. Мен ҳар доим беморларимга юриш кераклигини айтаман — бу эволюцион табиатан овчи ва теримчи бўлган одам учун табиий ҳол. Қанча кўп юрсангиз, ҳар қандай касалликдан тезроқ тузаласиз. Касал ёки юқори қон босими борларда — босим пасаяди. Юрак муаммолари бўлса ҳам — юринг. Простатит — янада кўпроқ юринг. Юриш, шунингдек, маълум гормонларни, масалан, кортизолни рағбатлантиради. Саломатликни сақлаш учун идеал танлов.
10, 5 ёки 3 минг қадам?
Бу ўлчов ҳамма учун мос келавермайди. Павел Евдокименконинг таъкидлашича, ёш ва соғлом бўлсангиз, биринчи кунданоқ 10 минг қадамдан бошлашингиз мумкин. Аммо тиззаларингиз оғриса, аста-секин бошлаш керак.
Ўтириб ишлайдиган офис ишчилари, қариялар, яқинда жароҳатланган ва заифлашган одамлар, сурункали касалликлар ва 2-тоифа диабет билан касалланганларни қийнаш керак эмас. Охирги тадқиқотлар шуни кўрсатадики, агар одам кунига 5 минг ёки ундан кўпроқ қадам ташласа, ортиқча вазн, юрак-қон томир касалликлари ва инсульт хавфини камайтиради.
Кунига уч минг қадам — бу дўконларга, жамоат транспорти бекатларига ва уй атрофида юрадиган одамнинг турмуш тарзидаги одатий юриш. Бу, албатта, жуда оз. Керакли минимал (беш мингдан ортиқ қадам) олиш учун кунига атиги ярим соатлик юриш кифоя қилади. Тўғри, бунда 30 дақиқани жуда тез ўтказиш кераклигини ҳисобга олиш лозим. Юриш жадал бўлиши керак, шундагина керакли натижага эришасиз.
Қандай ҳаракат қилиш керак?
Жуда тез юриш керак. Тренерлар ҳатто ярим соатлик ўта тез юриш ҳам спорт зали ва машқ жиҳозларисиз бир ой ичида бир неча килограммни йўқотишга ёрдам беради, дейишади. Фақат бунда терга ботадиган тарзда тез юриш лозим.
Албатта, бундай жадаллик ҳамма учун ҳам фойдали эмас. Шунинг учун буни ўзингиз белгилайсиз. Шуни билингки, қанчалик секин юрсангиз, шунча кўп масофани босиб ўтасиз. Ва албатта анча узоқ вақт юриш керак.
Қанча калория йўқотилади?
Бу ҳам индивидуалдир. Бироқ вояга етган одам бир соатлик юриш учун тахминан 300—400 килокалория сарфлайди. 10 минг қадам тахминан 400—600 калория йўқотишга ёрдам беради. Идеал вариант — ҳар куни камида бир соат юринг. Шунда соғлиғингизни назорат қилишингиз, эҳтимол вазн йўқотишингиз ҳам мумкин.
Изоҳ (0)