Буюк Британия бош вазири Борис Жонсон Лондон жануби-шарқий Европани ҳимоя қилиш учун «Тайфун» қирувчи самолётлари ва ҳарбий кемаларни юбориш имкониятини кўриб чиқаётганини маълум қилди, деб хабар беради The Times.
Унинг ҳисоблашича, Россиянинг Украинага нисбатан ҳаракати НАТОни Европадаги ўз позициясини мустаҳкамлашга мажбур этмоқда.
«Агар Россия яна бир босқинчилик ҳаракатини бошласа, Ғарб Россия олдини олишга уринаётган кўплаб ишларни амалга оширишга мажбур бўлади. Аслини олганда, бу ҳозирда содир бўлмоқда», — дейди Жонсон.
Бош вазирнинг маълум қилишича, Украина атрофидаги вазиятнинг кескинлашуви сабаб «Америка, Франция, Италия ва бошқа иттифоқчилар НАТОнинг жануби-шарқий қанотида ўз кучларини тўпламоқда, худди Буюк Британия шимоли-шарқни мустаҳкамлаётгани каби».
Шу билан бирга, Украина инқирозини дипломатик йўллар билан ҳал қилиш имконияти Россия вазиятнинг «деескалациясини» таъминласагина, сақланиб қолишини таъкидлаган.
Муаммоларни диалог орқали ҳал этиш масаласини муҳокама қилиш учун Буюк Британия мудофаа вазири Бен Уоллес ва мамлакат ТИВ раҳбари Лиз Трасс яқин кунларда Москвага боради.
Эслатиб ўтамиз, февраль бошида Борис Жонсон Киевда Владимир Зеленский билан учрашган ва у «россиялик аскарнинг оёғи Украина чегарасини кесиб ўтган дақиқада» Россияга қарши санкция қўллашга ваъда берганди.
Изоҳ (0)