«Бу ҳам тақдирнинг бир совғаси»: Том Хэнкс, Шерон Стоун ва қандли диабет билан яшаётган бошқа юлдузлар

Баъзи касалликларни даволаб бўлмайди, лекин улар билан нормал ҳаёт кечириш мумкин. Қандли диабет ана шундайлардан бири. Бу касалга чалинган қуйидаги машҳурлар тўлақонли ҳаёт кечириш учун ташхис уларга халақит бермаслигини исботлаган.

Том Хэнкс

«Оскар» совриндори 2013 йилда диабетга чалингани ҳақида маълум қилган. Актёр 1992 йилдан бери бу касаллик билан курашаётганини, кейинчалик эса унда 2-тоифа диабет ривожланганини тан олди. Бунинг сабабларидан бири сифатида у суратга олиш ишлари учун доимий парҳезлар ва вазннинг кучли ўзгаришини келтиради: «Мен дангаса америкаликлар авлодиданман, улар организм сигналларига эътибор беришмайди ва касаллик орттириб олишади. Мен аҳмоқ бўлганман». Актёр касаллик билан яшашни ўрганди ва ҳозирда ўзини жуда яхши ҳис қилмоқда.

Ҳолли Берри

Актриса 19 ёшида диабетга чалингани ҳақида билиб қолган ва дарҳол тўғри парҳезга ўтган ва ҳалигача унга риоя қилади. У дастлаб тез орада ўлсам керак деб ўйлаганини тан олади, кейин у касалликни тақдирнинг совғаси ва соғлом турмуш тарзини олиб бориши кераклиги ҳақида ишора сифатида қабул қила бошлади.

Шерон Стоун

Актриса инсулинга боғлиқ бўлган 1-тоифа диабетга чалинган. Бу эса инсулиннинг мунтазам дозаларини олиши лозимлигини англатади. Унинг чиройли кўринишининг сири нимада, деган саволга Стоун шундай жавоб беради: «Ҳеч қандай сир йўқ. Мен керак бўлган ҳамма нарсани қиламан: тўғри овқатланиш, ухлаш, машқ қилиш. Мен бахтлиман!».

Жорж Лукас

«Юлдузлар жанги» яратувчиси 2-тоифа диабетга йўлиққани ҳақида Вьетнамда хизмат қилиш учун тиббий кўрикдан ўтаётганда билган. Эҳтимол, у мойилликни отаси томондан бобосидан мерос қилиб олгандир.

Ник Жонас

Приянка Чопранинг турмуш ўртоғи 13 ёшидан бери қандли диабет билан яшайди: «Бу касаллик мени синдириши мумкин эди, лекин хайриятки, бундай бўлмади. Мен оддий ҳаёт кечираман, қанд миқдорини назорат қиламан ва инсулин уколларини вақтида оламан».

Юлия Савичева

Ҳомиладорлик пайтида қўшиқчи гестацион диабетдан азият чеккан. Ҳозирда ҳомиланинг вазни жуда тез ортиб бораётгани сабабли болажак оналарнинг, тахминан, 5 фоизи бу дардга йўлиқади. Туғруқдан кейин бу йўқолади, аммо овқатланиш тартиби назоратда бўлиши керак.