Актриса Шоҳида Исмоилова турмуш ўртоғи Маҳмуд Исмоилов оғир касалликни бошидан ўтказгани ҳақида гапириб берди (видео)

Ўзбекистонда хизмат кўрсатган артист Шоҳида Исмоилова турмуш ўртоғи Маҳмуд Исмоилов оғир касалликни бошидан ўтказгани ҳақида сўзлаб берди.

Бу ҳақида актриса YouTube’даги «YashinTV» каналига берган интервьюсида гапириб берди.

Маҳмуд ака бир нечта операцияларни бошларидан ўтказдилар. Лекин ҳеч ким қараб турмади. Айниқса, театримизнинг бугунги кундаги раҳбари Ёдгор акага раҳмат деган бўлардим. Чунки маблағ борасида анча ёрдам бердилар, шароит яратиб бердилар. Кимгадир керак бўлиб яшаш — бу бахт бўлса керак. Устоз санъаткорларимизнинг кўпчилиги қўллаб-қувватлашди. Айниқса, қийин пайтларимиз касалхонада неча ойлаб ётдик. Сабр қилсак, ҳамма нарса бўлар экан. Барибир ишонч ва умид инсоннинг қаддини тик тутишига ёрдам берар экан. Ноумид шайтон дейишади-ку.

Маҳмуд акам театрга энди раҳбар бўлганларида «Шоҳида ўзгариб қолади», дейишарди. Ҳар хил одам бор, ҳаммага бирдек ёқавермайсан. Мен аввал қандай бўлган бўлсам худди шундай яшаганмиз. Рўзғоримизда ҳам ҳаммаси қандай бўлса, шундайлигича қолган. Уйимизда иш ҳақида гаплашмаганмиз. Мен бу одамнинг шундай қийин вазиятда суянчиғи бўлганимдан хурсанд бўламан. Энди ҳозир яна озгина докторлик ишимиз, бир кичик операциямиз бор.

Ҳозирда Маҳмуд акам уйда ўтириб қола олмайдилар, агар уйда касалман, деб ўтириб қолса, ҳеч қачон ўринларидан турмайдилар, деб ўйлайман. Ҳозир ҳам театрга репетицияларга бориб турибдилар. Мен ҳар доим уларга куч бағишлаб тураман, ўзимнинг сўзим билан «сиз кучлисиз, инсон кучли бўлиши керак», деб айтаман. Оилада бир-бирини тушунган инсонлар бахтли бўлади. Ҳаёт фақат яхши кунлардан иборат эмас. Унинг ҳаётида ўнқир-чўнқир кунлар бўлади. Инсон ана шундай кунлардан мардонавор ўтиши ҳам мардлик ҳисобланади.

Биз шунча йил ҳалол меҳнат қилиб шу оиламизни тебратганмиз, фарзандларга ҳам ҳалол едирганмиз. Ҳалолликда гап кўп. Оилада берилаётган ризқ-насиба ҳалол бўлсагина, болангизга юқади. Шунинг учун ҳам мен шу инсон билан бирга яшаганимга ҳеч афсусланмайман. Агар яна қайта ҳаёт берилганида, «яна шу инсонни кўрармиканман», дейман, «шу инсон билан яшаган бўлардим», дейман. Афсуски бу синоатли ҳаёт инсонга бир марта берилар экан. Меҳнат ва яна меҳнат. Ўзинг яхши кўрган касбингда ишлашинг ҳам бу бахт бўлса керак. Касбимни, театримни, устозларимни яхши кўраман. Қандай қилиб уларни ёмон кўриб бўлади? Орада майда-чуйда нарсалар бўлиб ўтади, лекин бу нарсалар яхшилик томонидан ювилиб кетади, деб ўйлайман.

Маҳмуд ака билан турмуш қурганимизга 40 йил бўлди. Улар касал бўлганларида Маҳмуд акани йўқотиб қўйишдан қўрқдим. Гоҳида касалхоналарда бирга ётдик. Касалхонада  пандемия вақтида жой етмай қолгани учун ерда ётган одамларни ҳам кўрдим. Намозларимда худодан фақат уларнинг соғайиб кетишларини сўрадим. Уларсиз мен нима қиламан, деган фикр қўрқитди. Нега мен умидсиз бўлишим керак, умидли дунё-ку бу дунё, мен тушкунликка тушсам, Маҳмуд акани қандай оёққа қўяман, деб ўйлардим. Операцияларга кирганларида ўтириб йиғлаб-йиғлаб олардим.

Шундай кунларимда, айниқса, қизларим менга далда беришди. Учта қизнинг орқасидан ўғил топганман. Куёвларимни тарбиялаган ота-оналарига минг раҳмат дейман. Мен билан алмашиб шифохонада навбатчи бўлиб туришди. Елишди, югуришди. Уч марталаб Ҳиндистонга бориб келишди. Уларга катта раҳмат айтаман.

Шоҳида Исмлоилова, Ўзбекистонда хизмат кўрсатган артист