Ўзбекистонга қурол-яроғ ва ўқ дориларни яширин равишда олиб киришга бўлган ҳаракатлар фош этилди, деб хабар беради Давлат божхона қўмитаси ахборот хизмати.
Маълум қилинишича, Тошкент вилояти божхона бошқармаси «Ғишткўприк» чегара божхона постига кириб келган фуқаро Е.А. бошқарувидаги Toyota Land Cruiser автомашинаси холислар иштирокида божхона кўригидан ўтказилган. Текширув натижасида автомашинада тегишли ҳужжатлари ва оғзаки сўровда айтилмаган 1 дона пневматик тўппонча, 2 дона пневматик тўппонча учун газ балон ҳамда 310 дона пневматик ўқлар борлиги аниқланган.
Шунингдек, Тошкент вилояти божхона бошқармаси чегара божхона постига кириб келган фуқаро А.И. бошқарувидаги автомашина текширилганда автомобиль юкхонасидаги чангютгич ичида йўловчи божхона декларациясида кўрсатилмаган ва оғзаки сўровда айтилмаган 1 дона пневматик тўппонча ҳамда 243 дона пневматик тўппонча учун мўлжалланган ўқлар борлиги маълум бўлган.
Бундан ташқари, Фарғона вилояти божхона бошқармаси Фарғона аэропорти чегара божхона постида «яшил йўлак» орқали ҳаракатланаётган фуқаро Д.Ж.нинг қўл юклари божхона назоратидан ўтказилган. Текшириш натижасида юклар орасида 2 дона 12 калибрли ов қуроллари борлиги аниқланган.
Ҳозирда ушбу ҳолатлар юзасидан божхона органлари томонидан суриштирув ҳаракатлари давом эттирилмоқда.
Аввалроқ Тошкентда ўқотар қурол сақлаган шахс аниқланиб, қамоққа олингани, Тошкентда ўқотар қуролни 2 минг долларга сотмоқчи бўлган йигитлар ушлангани тўғрисида хабар берилганди.
Изоҳ (0)