3-fevral kuni Toshkentning Yunusobod tumanida daraxtlarning tagi betonlab ketilgani to‘g‘risida xabar berilgandi. Ekologiya va atrof-muhitni muhofaza qilish davlat qo‘mitasining ma’lum qilishicha, huquq-tartibot organlari tomonidan mazkur hududda navbatchilik tashkil etiladi.
Ma’lum qilinishicha, Davlat ekologiya qo‘mitasi raisi Narzullo Oblomuradov joyiga chiqib, holat bilan yaqindan tanishgan. Ekologiya, Ekopatrul va Milliy gvardiya xodimlari hamkorligida mazkur hududda navbatchilik tashkil etilib, 24 soat nazoratga olish vazifasi topshirilgan.
“Ayni damda mazkur holat yuzasidan tegishli hujjatlar rasmiylashtirilib, huquqni muhofaza qilish organlariga yuborildi”, — deyiladi xabarda.
Eslatib o‘tamiz, 2021-yilning dekabr oyida aynan shu hududda 18 tup daraxtning 10 tupi noma’lum shaxslar tomonidan yarmigacha arralab ketilgan edi. 2022-yilning 10-yanvarga o‘tar kechasi Toshkent shahrining Yunusobod tumanida noma’lum shaxslar 4 tup eldor qarag‘ayini kesib tashlagandi. Keyinroq 10 ta qarag‘ay arralab ketilgani bo‘yicha jinoyat ishi qo‘zg‘atilgan edi. Shundan keyin zarar yetkazilgan daraxtlar mahalla aholisi hamda ekologlar tomonidan skotch bilan o‘ralgan.
Izoh (0)