Россия «Аэрофлот» компаниясининг Санкт-Петербургдан Самарқандга учаётган АФЛ-2870 рейси Қозоғистонга фавқулодда қўнди. Бу ҳақда Uzbekistan Airports матбуот хизмати хабар берди.
Маълум қилинишича, бортида 56 нафар йўловчи бўлган самолёт 3 февраль куни маҳаллий вақт билан соат 10:56 да Қозоғстоннинг Қизилўрда шаҳрига қўнган. Бунга йўловчилардан бири бўлган ўзбекистонлик аёл юрагида муаммо пайдо бўлгани сабаб тез тиббий ёрдамга муҳтожлиги сабаб бўлган.
Самолёт қўнгач, аёл аэродромдан тез ёрдам машинасида олиб кетилган ва малакали тиббий ёрдам кўрсатиш учун тиббий муассасага ётқизилган.
Тошкент вақти билан соат 12:20 да эса 55 нафар йўловчи қолган самолёт Самарқанд аэропортига қўнган.
Эслатиб ўтамиз, 8 январь куни Москвадан Тошкентга учаётган самолёт ўлаётган йўловчи сабаб Қозонга қўнишга мажбур бўлганди. 25 январда эса Урганчдан Москвага учган самолёт йўловчилардан бирининг аҳволи оғирлашгани сабаб Оренбургга фавқулодда қўнганди. Бироқ 63 ёшли йўловчи шифокорлар етиб келгунига қадар лайнер салонида вафот этган.
Изоҳ (0)