Олий ва ўрта махсус таълим вазирлиги ва Таълим сифатини назорат қилиш давлат инспекцияси раҳбарлари бошчилигидаги ишчи гуруҳ Қашқадарё вилоятидаги 6 та олий таълим муассасасини комплекс ўрганиб чиқди. Бу ҳақда вазирлик матбуот хизмати хабар берди.
Ўрганиш натижалари юзасидан масъуллар ва ҳудудда жойлашган олий таълим муассасалари раҳбарлари ҳамда профессор-ўқитувчилар иштирокида йиғилиш ўтказилган.
Йиғилишда эришилган ютуқлар билан бирга, ҳудуддаги бир қатор олий таълим муассасаларида таълим сифати ва илмий салоҳият етишмаслиги, талабалар, ўқитувчилар учун зарур шароит-шароитлар яратилмагани, моддий-техник база билан тўлиқ таъминланмагани, ўқув жараёнини кредит-модуль тизими асосида ташкил этишдаги муаммолар, шунингдек, масофавий таълимни йўлга қўйишдаги камчиликлар танқид қилинган.
Хусусан, Қарши давлат университетининг Педагогика институти фаолияти қониқарсиз деб топилиб, директор, ўқув ишлари бўйича директор ўринбосари ва ўқув-методик бошқарма бошлиғига масофавий таълимни ташкил қилишда йўл қўйган жиддий камчиликлари учун ҳайфсан берилган. Муаммоларни бартараф этиш учун уч ойлик муддат қўйилган.
«Бугун масофавий таълим учун яратилган кўплаб махсус платформалар бўлатуриб, 3 минг нафар талабани Telegram орқали ўқитяпсизлар. Ҳамма нарса Telegram’да. Олий таълим муассасасининг ўз платформаси йўқми? Бу нима аҳвол? Президентимизнинг озгина ташвишлари минг чандон тўғри эканига амин бўлиб кетяпман. Барчаси бўйича хулоса қилинади. Энди таълим сиёсатига ҳамма жавоб беради», — дейди Тошқулов.
Маълумот учун, бугунги кунда Қашқадарё вилоятидаги 6 та ОТМда таълим билан қамров 28 фоизга ошиб, талабаларнинг умумий контингенти 51 431 нафарни ташкил қилмоқда. Профессор-ўқитувчиларнинг умумий сони 2 779 нафарни ташкил этиб, илмий салоҳият 23,4 фоизга ошган.
Эслатиб ўтамиз, олий ва ўрта махсус таълим вазири Абдуқодир Тошқулов ва Таълим сифатини назорат қилиш давлат инспекцияси бошлиғи Улуғбек Тошкенбоев бошчилигида 1 февралдан бошлаб тузилган ишчи гуруҳ республика олий таълим муассасаларини комплекс ўрганишни бошлаган.
Изоҳ (0)