Ярим ҳимоячи Кристиан Эриксен катта футболга қайтди.
У Англия Премьер Лигасининг «Брентфорд» клуби билан 6 ойлик шартнома имзолади. Аввалроқ келишувнинг яна бир йилга узайтирилиши мумкинлиги тўғрисида ҳам хабарлар янграганди. «Брентфорд» Англия чемпионатининг 23-туридан кейин 14-ўринда бормоқда.
Эслатиб ўтамиз, Эриксен 2021 йилнинг 12 июнида Евро—2020 доирасидаги Дания ва Финляндия ўртасидаги ўйинда (0:1) юрак хуружини бошдан ўтказганди, унда клиник ўлим ҳолати кузатилган ва майдонда унинг ҳаёти сақлаб қолинганди. Шундан кейин унга кардиовертер-дефибриллятор ўрнатилди.
Бундай қурилма билан Италияда футбол ўйнаш тақиқлангани боис Эриксен «Интер»дан кетишга мажбур бўлди. Миланликлар билан декабрь ойида шартномани бекор қилган Кристиан ўша вақтдан бери эркин агент мақомида бўлиб турганди.
Аввалроқ Европанинг бошқа жамоаларидан таклифлар борлигига қарамай Эриксеннинг Англияга қайтишни хоҳлаётгани ҳақида хабар берилганди.
Қайд этиш керак, даниялик футболчи учун АПЛ бегона эмас. У 2013 йилдан 2020- йилгача «Тоттенҳэм»да тўп сурган.
Изоҳ (0)