Қувасойда ҳоким ёрдамчиларига электроскутерлар берилди

Фарғона вилоят ҳокими Хайрулло Бозоров Қувасой шаҳридаги ўрганишлар жараёнида маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича ҳоким ёрдамчилари томонидан йўлга қўйилган ишлар билан танишди.

Шаҳарнинг «Исфарамсой» ҳамда «Алишер Навоий» МФЙ ҳудудларида ҳоким ёрдамчилари билан мулоқот қилган вилоят ҳокими, ишга киришган ҳоким ёрдамчилари, статистик маълумотлар йиғиш билан эмас, ҳар куни ҳеч бўлмаганда битта оилада тадбиркорликни йўлга қўйиш, битта фуқаронинг бандлигини таъминлаш каби аниқ вазифаларни ўзлари учун белгилаб олишлари шартлигини уқтирди.

Шаҳар ҳокимлиги томонидан ҳоким ёрдамчиларига яратиб берилган шароитлар ҳам эътибор тортди. 30 та ҳоким ёрдамчисининг барчаси алоҳида хона, компьютер жамланмаси билан таъминланган, ҳар бирига дастлабки ва қўшимча тўловларсиз йил давомида бўлиб тўлаш шарти билан электроскутерлар берилган.

Вилоят ҳокими хонадонларда чорвачилик, паррандачилик, қуёнчилик, асаларичилик, уруғчилик, кўчатчилик, гулчилик каби фаолият турларини йўлга қўйиш ҳам ҳоким ёрдамчиларининг устувор вазифалари қаторида эканига эътибор қаратган. Ҳоким аҳолига қўй, мол ва бошқа чорва турларини етказиб беришда банклар тақдим этган таъминотчиларга эмас, балки ҳозирги кунда хориждан зотдор чорва турларини олиб келаётган тадбиркорлар билан ишлаш кераклигини, банк олдида аҳоли манфаатларини ҳимоя қилишга ҳам ҳоким ёрдамчилари масъул эканини қайд этди.