Ўзбекистон йўлларида 28 январь куни содир бўлган бахтсиз ҳодисалар тафсилотини тақдим этамиз.
Сирдарёда «ЗИЛ» ёниб кетди
Дастлабки маълумотларга кўра, 2022 йил 28 январь куни соат 20:00 ларда Гулистон тумани «Мевазор» МФЙ ҳудудида жойлашган газ тўлдириш шохобчасида ҳайдовчи Ж.Х. (1980 йилда туғилган) газ тўлдириш вақтида хавфсизлик қоидаларига риоя қилмасдан (улагич узилмасдан), «ЗИЛ ММЗ-554» юк автомобилини ҳаракатга келтиргани оқибатида автомобилда ёнғин юзага келган. Ёнғин ўт ўчирувчилар томонидан бартараф этилган.
Ҳодиса натижасида тан жароҳати олган фуқаролар йўқ. Ҳозирда туман ФВБ ва ЙҲХБ ходимлари томонидан суриштирув олиб борилмоқда.
Фарғонада Spark ва Trailblazer тўқнашуви оқибатида ёнғин келиб чиқди
2022 йилнинг 28 январь куни соат 23:05 ларда Фарғона шаҳри С.Темур кўчасида ҳайдовчи Р.А (1991 йилда туғилган) Trailblazer автомобилини бошқариб кетаётиб, қарама-қарши йўналишда ҳаракатланиб келаётган С.А. (1996 йилда туғилган) бошқарувидаги Spark автомобили билан тўқнашган.
Оқибатда Spark автомобилининг олд қисмида ёнғин келиб чиққан.
Ҳайдовчи С.А. чап оёқ болдир суягини ёпиқ синиши ташхиси билан Фарғона шаҳар шифохонасига ётқизилган. Ёнғин ўт ўчирувчилар томонидан бартараф этилган.
Мазкур ҳолат юзасидан Фарғона шаҳар ИИО ФМБ ҳузуридаги тергов бўлими ҳамда ФВБ ходимлари томонидан текширув ўтказилмоқда.
Изоҳ (0)