Buxoroda Afg‘oniston fuqarosi tomonidan sotish maqsadida yashirilgan 54 kilogramm opiy giyohvandlik moddasi aniqlandi. Bu haqda IIV matbuot xizmati xabar berdi.
Qayd etilishicha, 20-yanvar kuni Tojikiston IIVdan Afg‘oniston fuqarosi 60 kilogramm opiy giyohvandlik moddasini 360 ming dollarga baholab, Buxoro viloyatida sotish uchun xaridor izlayotgani haqida ma’lumot olingan. Ushbu ma’lumotni tekshirish uchun IIV Jinoyat qidiruv bosh boshqarmasi xodimlaridan iborat tezkor guruh zudlik bilan Buxoro shahriga safarbar qilingan.
Tezkor guruh Abu ismli shaxs giyohvand moddasi namunasini Buxoro shahr Alpomish ko‘chasida joylashgan mehmonxona oldidagi tandirga yashirganini o‘rgangan. 21-yanvar kuni tezkor guruh kelishilgan joydan 39 gramm opiy giyohvandlik vositasi hujjatlashtirib olinib, voqea joyida kuzatuv ishlari davom ettirilgan.
Kuzatuv joyida o‘zini shubhali tutgan shaxs ushlangan va opiy namunasini u joylashtirganini tan olib, moddaning qolgan qismi uyida ko‘mib qo‘yilganini ma’lum qilgan. Shundan so‘ng uning uyi tekshirilganda darvozaxona burchagiga ko‘mib qo‘yilgan ikkita alyumin idishga yashirilgan 54 kilogramm opiy moddasi ashyoviy dalil sifatida olingan.
Dastlabki surishtiruv davomida giyohvand moddasini gumonlanuvchiga oldindan tanish bo‘lgan Afg‘oniston fuqarosi 14-yanvar kuni 13 tonna kartoshka orasida Buxoroda sotish uchun yetkazib bergani, moddalarni saqlashi evaziga har bir kilosi uchun 500 dollardan berishni va’da qilgani aniqlangan. U kelishilgan mahsulotni olib ketish uchun xaridor yuborishini aytgan.
Ayni vaqtda mazkur holat yuzasidan Buxoro viloyati IIB tomonidan tergovga qadar tekshiruv haraktlari olib borilmoqda.
Avvalroq Toshkent viloyatining Toshkent tumanida 77 kilogrammdan ortiq opiy va gashishni kartoshka ko‘rinishida yashirgan narkokuryerlar ushlangani, Yangiyo‘l shahridagi xonadondan 45 kilogramm marixuana topilgani haqida xabar berilgan edi.
Izoh (0)