Ўзбекистонда 2021 йилда тотализатор ва букмекерлик фаолиятига оид 100 дан ортиқ реклама бартараф этилиб, 30 дан ортиқ сайтга кириш чекланди. Бу ҳақда АОКАда ўтказилган брифингда Истеъмолчилар ҳуқуқларини ҳимоя қилиш агентлиги матбуот котиби Моҳрухсор Тоғаева маълум қилди.
Қайд этилишича, агентлик томонидан 2021 йил мобайнида 27 мингга яқин ўрганишлар ўтказилган бўлиб, шундан 15 минг 486 ҳолатда турли камчиликлар аниқланган ва уларни тезкор бартараф этиш чоралари кўрилган.
Реклама қилиниши қонун билан тақиқланган ёки чекланган маҳсулотлар, хусусан, тамаки, электрон сигареталар, энергетик ичимликлар, алкоголь, пиво, қимор ва таваккалчиликка асосланган бошқа ўйинлар рекламаси бўйича аниқланган ҳолатлар бартараф этилиши таъминланган.
1 минг 105 та ўрганишлардан 102 та ҳолатда тотализатор ва букмекерлик хизматлар рекламаси аниқланган ва уларнинг барчаси бартараф этилган. 30 дан ортиқ тотализатор ва букмекерлик рекламасини ноқонуний равишда юритувчи сайтларга кириш чеклаб қўйилган.
Савдо ва умумий овқатланиш объектлари ташқи ва ички қисмида реклама қилиниши тақиқланган маҳсулотларга, яйне тамаки, алкоголь, электрон сигарет, пиво ва бошқа реклама-ахборотларини жойлаштириш ҳолатлари бўйича олиб борилган 2 611 та ўрганишлар давомида 1 минг 71 та ҳолатда аниқланган камчиликлар бартараф қилинган. Шунингдек, дарахтларга ўрнатилган 3 минг 416 та ноқонуний реклама ва эълонлар олиб ташланиши таъминланган.
Бундан ташқари, моддий маданий мероснинг 386 та кўчмас мулк объектларида ташқи рекламани жойлаштириш бўйича ўрганишлар олиб борилган. Натижада 25 дан ортиқ ҳолатда рухсатсиз реклама жойлаштирилгани аниқланган ва уларга нисбатан тегишли чоралар кўрилган.
Ижтимоий тармоқларда жойлаштирилган рекламаларнинг 4 минг 387 та ҳолати юзасидан ўрганишлар ўтказилган ва аниқланган барча камчиликлар бартараф этилган.
Шунингдек, нотўғри реклама оқибатида сотиб олинган товар (иш, хизмат) туфайли истеъмолчиларга 146 миллион сўм миқдорда етказилган зиён тўлиқ ҳажмда қоплаб берилган.
Изоҳ (0)