O‘zbekistonda 2021-yilda totalizator va bukmekerlikni reklama qiluvchi 30 dan ortiq sayt bloklandi

O‘zbekistonda 2021-yilda totalizator va bukmekerlik faoliyatiga oid 100 dan ortiq reklama bartaraf etilib, 30 dan ortiq saytga kirish cheklandi. Bu haqda AOKAda o‘tkazilgan brifingda Iste’molchilar huquqlarini himoya qilish agentligi matbuot kotibi Mohruxsor Tog‘ayeva ma’lum qildi.

Qayd etilishicha, agentlik tomonidan 2021-yil mobaynida 27 mingga yaqin o‘rganishlar o‘tkazilgan bo‘lib, shundan 15 ming 486 holatda turli kamchiliklar aniqlangan va ularni tezkor bartaraf etish choralari ko‘rilgan.

Reklama qilinishi qonun bilan taqiqlangan yoki cheklangan mahsulotlar, xususan, tamaki, elektron sigaretalar, energetik ichimliklar, alkogol, pivo, qimor va tavakkalchilikka asoslangan boshqa o‘yinlar reklamasi bo‘yicha aniqlangan holatlar bartaraf etilishi ta’minlangan.

1 ming 105 ta o‘rganishlardan 102 ta holatda totalizator va bukmekerlik xizmatlar reklamasi aniqlangan va ularning barchasi bartaraf etilgan. 30 dan ortiq totalizator va bukmekerlik reklamasini noqonuniy ravishda yurituvchi saytlarga kirish cheklab qo‘yilgan.

Savdo va umumiy ovqatlanish obyektlari tashqi va ichki qismida reklama qilinishi taqiqlangan mahsulotlarga, yayne tamaki, alkogol, elektron sigaret, pivo va boshqa reklama-axborotlarini joylashtirish holatlari bo‘yicha olib borilgan 2 611 ta o‘rganishlar davomida 1 ming 71 ta holatda aniqlangan kamchiliklar bartaraf qilingan. Shuningdek, daraxtlarga o‘rnatilgan 3 ming 416 ta noqonuniy reklama va e’lonlar olib tashlanishi ta’minlangan.

Bundan tashqari, moddiy madaniy merosning 386 ta ko‘chmas mulk obyektlarida tashqi reklamani joylashtirish bo‘yicha o‘rganishlar olib borilgan. Natijada 25 dan ortiq holatda ruxsatsiz reklama joylashtirilgani aniqlangan va ularga nisbatan tegishli choralar ko‘rilgan.

Ijtimoiy tarmoqlarda joylashtirilgan reklamalarning 4 ming 387 ta holati yuzasidan o‘rganishlar o‘tkazilgan va aniqlangan barcha kamchiliklar bartaraf etilgan.

Shuningdek, noto‘g‘ri reklama oqibatida sotib olingan tovar (ish, xizmat) tufayli iste’molchilarga 146 million so‘m miqdorda yetkazilgan ziyon to‘liq hajmda qoplab berilgan.