«Толибон» ҳаракатининг биринчи делегацияси Европада бўлди ва афғон фуқаролик жамиятининг аъзолари билан музокаралар ўтказди. Бу ҳақда Норвегия ташқи ишлар вазирлиги ахборотига таяниб, The Local хабар берган.
Хабарга кўра, Афғонистонда «Толибон» тузган ҳукуматда ташқи ишлар вазири лавозимини эгаллаган Амир Хон Муттақий бошчилигидаги делегация уч кунлик ташрифнинг биринчи кунида аёллар ҳуқуқлари бўйича фаоллар ва журналистлар, кейин ғарб дипломатлари билан учрашган.
Қайд этилишича, Норвегия кўмагида олиб борилаётган музокаралар Ослодан таҳқарида Soria Moria меҳмонхонасида ёпиқ эшиклар ортида ўтказилган. Кобул делегациясига «Толибон»даги энг шафқатсиз гуруҳлардан бири ҳисобланувчи «Ҳаққоний» тармоғи етакчиси Анаса Ҳаққоний ҳам қўшилган.
Норвегия ташқи ишлар вазири Анникен Хьюитфельд ҳали ҳеч бир мамлакат «Толибон» ҳукуматини расман тан олмаганини қайд этган ва музокараларда толибларни расман тан олиш ёки уларнинг хатт-ҳаракатларига хайриҳоҳликни англатмаслигини таъкидлаган.
«Лекин биз мамлакатдаги ҳукумат билан де-факто суҳбатлашишимиз зарур. Афғонистондаги сиёсий вазият энг оғир ижтимоий инқирозга олиб келмаслиги учун ҳаракат қилишимиз керак», — деган Норвегия ТИВ раҳбари.
Шунингдек, толиблар Европада АҚШ, Франция, Буюк Британия, Германия, Италия ва Европа иттифоқи вакиллари билан ҳам учрашади. Норвегия расмийлари билан икки томонлама музокаралар ҳам ўтказилади.
Мамлакатдан чиқиб кетган Афғонистон стратегик тадқиқотлар институти раҳбари Довуд Морадиан Норвегиянинг ушбу тинчлик йўлидаги ташаббусини танқид қилган.
«Толибон» ташқи ишлар вазирини қабул қилиш аёллар ҳуқуқларига риоя этилиши учун курашиб келаётган Норвегиянинг мамлакат сифатидаги глобал имижига салбий таъсир қилади, чунки «Толибон» деярли гендер апартеидини бошлаган», — деган у.
Афғонистонда ҳукумат тепасига келган «Толибон» мамлакатда шифокорларнинг аёлларни маҳрамларсиз қабул қилишини тақиқлаган, шунингдек аёлларнинг ҳижобсиз юришига йўл қўйилмаслигини билдирганди.
Изоҳ (0)