Ижтимоий тармоқларда Ангрен шаҳрида ЙПХ ходими Damas ҳайдовчисига куч ишлатгани тасвирланган видео тарқалди. Тошкент вилояти ИИББ ахборот хизмати лавҳадаги ҳолат бир томонлама ёритилганини маълум қилиб, аслида, вазият қандай бўлгани тасвирланган бошқа бир видео билан бўлишди.
Ижтимоий тармоқларда тарқалган видеода ЙПХ ходими Damas ҳайдовчисига куч ишлатиб, уни машинадан туширишга урингани тасвирланган.
Иккинчи лавҳада эса ЙПХ инспектори ҳайдовчига «Хавфсиз ҳудуд» махсус тадбирида экани ҳақида маълумот бергани, ҳайдовчи эса у тарафга тамаки пуфлаганича, ҳужжатларни тақдим этишдан бош тортганини кўриш мумкин. Инспектор холислар иштирокида бир неча маротаба яхши муомала билан ундан ҳужжатларини тақдим этишини сўраган. Сўнг машина эшигини очишга уринган вақтида эса ҳайдовчи унинг қўлини эшик ойнасига қисиб олиб тутқични бураган.
«Энди холис фикрингизни айтинг, шу вазиятда ЙПХ инспектори ҳайдовчини текширмаслиги, майли, ҳужжат бермас эканлар, деб қўйиб юбориши керакмиди?», — деб ёзади вилоят ИИББ ахборот хизмати раҳбари Бобур Тўлаганов.
Таъкидланишича, «Хавфсиз ҳудуд» тезкор профилактик тадбири одатда криминоген вазияти юзасидан ҳуқуқбузарлик ёки жиноятчилик, нисбатан кўпайган ҳудудларда ташкил этилади. Масалан, ушбу ҳудудда қидирувдаги жиноятчи, ҳуқуқбузар ёки ноқонуний маҳсулотларни олиб ўтиш ҳолатлари бор ва махсус назорат тадбири ўтказиляпти. «Шу каби ҳолатларга чек қўйиш мақсадида тадбирга жалб этилган ходимларга ҳайдовчи ҳужжат бермаса, у текширилмай қўйиб юборилса, кейинчалик шу ерда жиноятчиликнинг авж олиши ўзимизга ёки бирор яқинимизга ҳам таъсир кўрсатмаслигига кафолат борми?», — дейди Тўлаганов.
Шунингдек, у айрим блогерларни бирор материални эълон қилишдан олдин тегишли ташкилот масъуллари билан боғланиб, аниқлаштириб олишга чақирган.
Аввалроқ Сирдарёда ЙПХ ходимининг «встречний» юргани тасвирланган видеони тарқатган ҳайдовчи қамоққа олинганди. Кейинроқ вилоят ИИБ воқеа аслида қандай бўлгани тўғрисида маълумот берганди.
Мавзуга доир:
Изоҳ (0)