Тележурналист Хайрулла Нуриддинов «Ўзбекистон 24» телеканалида эфирга узатилган «Менимча» кўрсатувида Тошкентга трамвай қатновини қайтариш тарафдори эканини айтиб ўтди.
«Шаҳар транспорти мавзуси очилганлигидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча.
Катта ва гавжум шаҳарга трамвай жуда асқатади. Ҳаммамизнинг эсимизда-ку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — дейди Хайрулла Нуриддинов.
Маълумот учун, Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз боради.
«Биласанми, менга берган маълумотинг бўйича бирорта аниқ рақам йўқ. Фақат маслаҳат ва тавсия. Бу нима деган гап? Мен сендан буни кутмагандим. Нега менга Тошкент бўйича алоҳида, туман бўйича алоҳида (маълумот) бермайсан. Энг оғир туман қайси? Энг оғир бекат қайси? Энг оғир тирбандлик қаерда? Одамлар биздан қаерда нажот кутмоқда? Бу нарса йўқ менга берган маълумотингда. Умумий гап», — дейди президент Илҳом Маҳкамовга.
Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Ипподром ўртасида қатновчи 17-йўналиш ёпилган ва шу тариқа Тошкент трамвайининг 115 йиллик тарихига нуқта қўйилганди.
Изоҳ (0)