Ўзбекистон аэропортларида топширилиши мажбурий этиб белгиланган 5 долларлик экспресс-тест пули нимага сарфланиши маълум қилинди

«Ўзбекистон 24» телеканалида эфирга узатилган «Менимча» кўрсатувида сўнгги кунларда ижтимоий тармоқларда муҳокамага сабаб бўлган аэропортдаги экспресс-тест нархи масаласига ҳам тўхталиб ўтилди. Кўрсатув ижодкорлари ушбу масала юзасидан Давлат божхона қўмитаси ахборот хизмати ходими Ҳусан Тангриев билан боғланди.

Ҳусан Тангриев 5 АҚШ долларилик экспресс антиген тести пули нималарга сарфланиши юзасидан изоҳ берди.

«15–19 январь кунлари республикамизга 56 910 нафар жисмоний шахслар кириб келди. Уларни барчасида камида 48 соат олдин коронавирусга топширилган ПЗР-тест манфий натижаси бўйича маълумотнома бўлган. Лекин шунга қарамасдан 1458 нафар фуқарода коронавирус аниқланган.

Афсуски, мазкур тадбирлар ижтимоий тармоқларда нотўғри талқин қилинмоқда. Гўёки республикамизга кириб келаётган шахслардан пул ундириш воситаси сифатида қаралмоқда.

Шу вақтга қадар чегара орқали ҳаракат қилаётган фуқаролардан коронавирус синовлари олиш жараёни бир неча ташкилотлар томонидан турли усулларда ташкил этилган. Тест синовлари учун ундириладиган тўловларга аҳамият бериладиган бўлса, турлича белгиланган. 100 минг сўмдан 150 минг сўмгача.

Ҳозирда 31 та чегара-божхона постларимизда коронавирус инфекциясини аниқлаш учун тегишли ташкилий чора-тадбирлар амалга оширилди. Мазкур жараёнларга 240 нафардан зиёд тиббиёт ходимларини ёлладик. Маълумотларни ахборот тизимида рўйхатдан ўтказувчи 200 нафардан зиёд операторлар ишга олинди. Тест олиш жойлари зарурий мебель, инвентарлар ва электр таъминоти билан таъминланди. Жараёнга 300 дан зиёд компьютер ва принтер жамланмалари жалб этилди.

Дастлабки босқичда 600 минг дона экспресс антиген тестлар ҳозирлаб қўйилган. Коронавирус билан касалланган жисмоний шахсларга даволанишлари учун COVID-box дорилар тўплами бепул борилмоқда. Шу мақсадда 5000 дона COVID-box тўпламлари ажратиб қўйилган.

Экспресс антиген тест учун белгиланган 5 АҚШ доллари айни шу харажатларни қамраб олишга хизмати қилади халос», – дейди Ҳусан Тангриев.

Эслатиб ўтамиз, 15 январдан бошлаб Ўзбекистон аэропортларида коронавирусга қарши мажбурий тест топшириш жорий этилганди. Ушбу тартиб ортидан йўловчиларга айрим муаммоларни келтириб чиқарди.

Хусусан, Тошкент халқаро аэропортида вирус тарқалиши хавфини оширган ҳолда тест олиш учун турнақатор навбатлар юзага келгани акс этган видеолар тарқалди. «Podrobno.uz»нинг ёзишича, бунга тест синовлари ўтказиладиган пунктлар ҳамда валюта айирбошлаш шохобчалари етарли эмаслиги сабаб бўлган.