Кенияда Самбуру провинциясидаги қўриқхонада эгизак филлар дунёга келди, дея хабар бермоқда Reuters.
Фото: Twitter
Ўғил ва қиз эгизак филларни дам олиш кунларида сафаридаги қўриқхонада юрган гидлар пайқаб қолди. Бу Save the Elephants маҳаллий табиатни асраш ташкилоти фаолияти давомида дуч келган иккинчи эгизак филлар.
Хайрия ташкилоти маълумотларига кўра эгизак филларнинг туғилиши бўйича сўнгги машҳур ҳолат 2006 йилда кузатилган. Янги туғилган филларнинг фақат 1 фоизигина эгизак бўлиши мумкин. Шу сабабли Кениядаги каби ҳолат ўта кам учрайди.
Фото: Twitter
Фото: Twitter
Save the Elephants хайрия ташкилоти асосчиси Иэн Дуглас-Гамилтон ҳозир янги туғилган филлар учун оғир экани сабаби 15 йил олдин туғилган эгизаклар ҳам узоқ яшамаганини қайд этган. Кўпинча чақалоқ филларни боқиш учун сут етишмайди.
Қайд этилишича, Африка филлари сут эмизувчилар орасида энг узоқ вақт ҳомиладорлик даврини ўтказадиган ҳайвонлар. Филлар фарзандларини қарийб 22 ой қорнида кўтариб юради ва тўрт йилда бир марта кўпаяди.
Фил суяги савдоси ва филлар учун зарур табиий шароитларнинг йўқолиб бориши, мазкур улкан ҳайвонларни Халқаро табиатни муҳофаза қилиш иттифоқининг қизил рўйхатига киритишга олиб келди. Бироқ Кения туризм вазирлиги 2020 йилда браконьерлик фаолиятига аёвсиз кураш олиб борилганидан кейин мамлакатда филлар сони кўпайганини билдирган яъни 1989 йилда 16 мингта фил ҳаёт кечирган бўлса, 2018 йилда улар қарийб икки баравар кўпайиб 34 мингтага етган.
