Германия ҳарбий-денгиз кучларининг раҳбари Қрим ҳақидаги гапларидан кейин истеъфога чиқди

Германия ҳарбий-денгиз кучларининг раҳбари, вице-адмирал Кай-Ахим Шенбах Қрим ҳеч қачон Украинага қайтмаслиги ҳақида айтган гапларидан кейин истеъфога чиқди.

«Федерал мудофаа вазиридан мени зудлик билан ҳарбий-денгиз кучлари раҳбари лавозимидан озод этишни сўрадим», — дейилади ҳарбий-денгиз кучлари матбуот маркази баёнотида.

Мудофаа вазири Кристина Ламбрехт вице-адмиралнинг аризасини қабул қилди.

Шенбах Ҳиндистоннинг Маноҳара Паррикара мудофаа тадқиқотлари институтида бўлиб ўтган анжуманда шундай деганди: «Қрим ярим ороли Украина тасарруфида эмас, у ҳеч қачон қайтиб келмайди, бу ҳақиқат».

Шундан сўнг Украина Ташқи ишлар вазирлиги Германия ҳукуматидан ҳарбий-денгиз кучлари раҳбарининг сўзларини рад этишни талаб қилди. Вазирлик матбуот котиби Олег Николенконинг сўзларига кўра, бу «Украинанинг суверенитети ва ҳудудий яхлитлигига ҳамда Европадаги хавфсизлик билан боғлиқ вазиятни юмшатиш ҳаракатларига путур етказади».

Николенко Шенбахнинг баёнотларини «мутлақо қабул қилиб бўлмайдиган» деб атади ҳамда «Украина ва ҳамкорларининг қатъий саъй-ҳаракатлари билан» ярим орол Украинага қайтишига ишонч билдирди.

Германиянинг Украинадаги элчиси Анка Фелдгузен мамлакат ташқи ишлар вазирлигига чақирилди.

Германия Мудофаа вазирлиги Шенбахнинг сўзлари вазирликнинг расмий позициясини акс эттирмаслигини маълум қилди. «Ушбу баёнотлар мазмун ва шакл  жиҳатидан вазирлик позициясига ҳеч қанақасига мос келмайди», — деди вазирлик вакили «ТАСС»га. Унинг қўшимча қилишича,  Шенбахга бундесвер бош инспектори Эберхард Зорн олдида «мулоҳаза билдириш имкони берилади».

Январь ойи бошида Украина собиқ мудофаа вазири ва президентликка собиқ номзод Анатолий Гриценко мамлакат «вақтинчалик босиб олинган ҳудудларни» қайтариб ололмаслигини айтганди.

2021 йилнинг август ойида Киевда Қрим платформаси саммити бўлиб ўтди, унда яриморолни Украинага қайтариш масаласи муҳокама қилинди. Тадбир иштирокчилари қўшма якуний декларацияни қабул қилди, унда Москвага босимни жумладан чекловчи ҳаракатлар орқали давом эттириш режалари эълон қилди. Шунингдек, улар Қримнинг «ноқонуний босиб олинишини тан олмаслик» сиёсатини давом эттиришга келишиб олди.

Қрим 2014 йилда референдум натижасида Россия таркибига кирган. Украина ва Ғарб давлатлари расмийлари овоз бериш натижаларини тан олмайди. Россия ярим оролга эгалик масаласини ёпиқ деб ҳисоблайди.