Наманган вилояти Норин туманидаги 1-мактаб ўқувчиси Эргашалиев Муроджон Республика миқёсида ўтказилган онлайн олимпиадада математика фани бўйича фахрли 1-ўринни қўлга киритгани муносабати билан Халқ таълими вазирлиги унга ноутбук совға қилгани, лекин ноутбукни мактаб ўқитувчилари тортиб олганини маълум қилиб видеомурожаат йўллади.
«2022 йил 10 январь куни бўлиб ўтган Республика онлайн олимпиадасида биринчи ўринни эгалладим ва менга ноутбук билан фахрий ёрлиқ берилди. Аммо бу ноутбукни мактабимиз ўқитувчилари олиб қўйди. Сабабини сўраганимда ‘бу мукофот сеники эмас, чунки сени номингдан биз ишлаганмиз, биз меҳнат қилганмиз’ деди. Ўқитувчига берилган совғани эса методист ишлатади, у ҳам меҳнат қилган деб методистга бериб қўйди», – дейди Муроджон ўз видеомурожаатида.
Бироздан кейин Муроджонга ноутбук берилгани ҳақида видео эълон қилинди. Унда айтилишича, Эргашалиев Муроджон тушунмасдан ижтимоий тармоқлар орқали видео мурожаат қилган. Мактаб маъмуриятининг маълум қилишича, ноутбук 24 январь кунги эрталабки сафланишда барча ўқувчилар орасида тантали равишда топширилиши режалаштирилган.
Ўқувчига Халқ таълими вазирлиги томонидан замонавий ноутбук ҳамда Фахрий ёрлиқ шу 22 январь куни ота-онаси ва тегишли мутасадди ташкилотлар раҳбарлари иштирокида топширилган.
Эслатиб ўтамиз, аввалроқ Нуробод туманининг 41-умумтаълим мактабининг 8-синф ўқувчиси Сардор Сатторов «Бир миллион ўзбек дастурчилари» лойиҳасининг вилоят босқичида 1-ўринни олишига қарамай, унга 3-даражали диплом ҳамда ишлатилган (эски) ноутбук совға қилинган ҳақида хабар берилганди. «Бу номардлар эскини бергунча битта китоб билан диплом берса бўлмасмиди? Чангини ҳам артмаган буни, ким билан неча йилдан бери чанг босиб ётган. Шунчалик ҳам номардлик бўладими?», — дейди ўқувчининг бобоси.
Нуробод тумани ҳокимининг фармойиши билан мазкур ҳолатда масъулиятсизликка йўл қўйган ҳоким ўринбосарига ҳайфсан берилди, кейинроқ ишдан бўшатилди.
Ўқувчига берилган эски ноутбук янгисига алмаштириб берилди.
Изоҳ (0)