АҚШнинг 26-президенти Теодор Рузвельтнинг Нью-Йоркдаги Америка табиий тарихи музейига кираверишда ўрнатилган отлиқ ҳайкали олиб ташланди. Бу ҳақда CNN хабар берди.
Ҳайкалтарошлик композицияси музей олдига 1940 йилда ўрнатилган. Унда Рузвельт от устида, унинг ёнида эса Американинг туб аҳолиси вакили ва асли африкалик бўлган икки киши пиёда тасвирланган. 1970 йиллардан бери фаоллар ёдгорликни бир неча бор танқид қилиб, уни олиб ташлашни талаб қилган.
Ҳайкални олиб ташлаш тўғрисидаги якуний қарор 2020 йилнинг ёзида афроамерикалик Жорж Флойднинг ўлимидан кейинги норозилик намойишлари фонида қабул қилинган эди. Музей президенти Эллен Фаттернинг айтишича, замонавий жамиятда ёдгорликнинг композицион моҳияти кўпинча ирқчилик ва мустамлакачилик рамзи сифатида қабул қилинмоқда.
Ҳайкални олиб ташлаш тарихий меросни сақлаш бўйича мутахассислар раҳбарлигида амалга оширилди ва шаҳар бошқармалари билан келишилди, деди музей вакили. Иш тахминан икки миллион долларга тушган.
Энди ёдгорлик консервацияга, сўнгра Шимолий Дакота штатининг Медора шаҳрида 2026 йилда очилиши режалаштирилган Рузвельт президентлик кутубхонасига юборилади.
Изоҳ (0)