Вулқон отилиши ва цунамидан жабр кўрган Тонга ороллари аҳолисига гуманитар ёрдам олиб кетаётган Австралия самолёти бортдаги бир кишида коронавирус тестининг натижаси мусбат чиққани сабабли ярим йўлдан аэропортга қайтди. Бу ҳақда The Week хабар берди.
Парвознинг барча иштирокчилари бортга чиқишдан олдин тезкор антиген тестларидан салбий натижа билан ўтган, деб ёзади нашр Австралия қуролли кучлари вакилига таяниб. Бироқ бундан олдин улар ПЗР-тестларини ҳам топширган, натижалар самолёт йўлга чиққанидан сўнг маълум бўлган. Бир кишида ПЗР-тести ижобий натижа кўрсатган, экипажга ортга қайтиш буюрилган. Гуманитар ёрдам 20 январь куни Брисбен шаҳридан учган бошқа самолётга қайта ортилган.
Хунга-Хаапай Тонгу вулқонининг отилиши ва мамлакатга цунами урилишидан сўнг Буюк Британия, Хитой ва Япония Тонгага гуманитар ёрдам жўнатмоқда. Оролларда 105 мингга яқин одам истиқомат қилади, пандемия бошлангандан бери мамлакат ҳудудида фақат битта COVID-19 га чалиниш ҳолати аниқланган, ҳозир у ерда ҳеч ким инфекция билан оғримаган.
Тонга ҳукумати коронавирус тарқалишининг олдини олиш учун чегарада қаттиқ назорат ўрнатган. 20 январдан оролларга келтирилишни бошлаган гуманитар ёрдам маҳаллий аҳолига контактсиз узатилмоқда.
Австралия ва Янги Зеландиядан ёрдам жўнатмалари Тонгага етиб боргани айтилмоқда — хусусан, ичимлик суви захиралари, денгиз сувини тузсизлантириш воситалари, дори-дармонлар, алоқа воситалари ва гигиена воситалари етказилган.
Табиий офат туфайли, дастлабки расмий маълумотларга кўра, камида уч киши ҳалок бўлган ва кўплаб қишлоқлар деярли бутунлай вайрон бўлган. Вулқон отилишдан сўнг, барча юзалар вулқон кули билан қопланган, натижада ичимлик сувининг тақчиллиги кутилмоқда.
Изоҳ (0)