Эрон президенти Иброҳим Раисий НАТОнинг мустақил давлатлар ички ишига аралашиш тактикасини ҳийла-найрангга тўла деб атаб, у охир-оқибат альянснинг парчаланишига олиб келишини маълум қилди, деб хабар беради «Интерфакс».
«НАТО турли яширин баҳоналар билан қатор мамлакатлар ҳудудига кириш билан шуғулланмоқда, улар мустақил давлатларга таҳдид қиляпти. Ғарб материясининг тарқатилиши ва мустақил демократияларга қарши туриш, халқларнинг ўзини ўзи идентификация қилиши, халқларнинг маданияти ва анъаналари НАТО кун тартибида ва бу шунчаки ёлғон. Биз уларнинг ҳаракатида ушбу ёлғонни кўряпмиз, бу эса охир-оқибат унинг парчаланишига олиб келади», — дейди Раисий Россия давлат думасидаги чиқишида.
Шунингдек, у «ҳукмронлик сиёсати»ни ва Ғарб жорий этаётган санкцияларни танқид қилган, шунингдек, мустақил давлатларни унга қарши бирлашишга чақирган.
«Санкцияларнинг жорий этилиши — бу янги ҳукмронликнинг яна бир шакли ва бунга қарши туриш учун мустақил давлатлар ҳамкорлиги ҳамда коллектив жавоб керак. Акс ҳолда турли баҳоналар билан улар санкциялар жорий этади. Улар ҳатто ўз иттифоқчиларга қарши ҳам санкциялар жорий этмоқда», — дейди Раисий.
Аввалроқ АҚШ президенти Жо Байден «Путин ҳали ҳеч қачон кўрмаган» санкциялар ҳақида гапиргани, Хитой Эронга нисбатан қўлланаётган санкцияларга қарши чиқиш қилгани тўғрисида хабар берилганди.
Изоҳ (0)