Тошкентда эндиликда тез ёрдам хизматига тушган чақириқлар сараланиб, аҳволи енгил беморларга поликлиникалар ҳам тез тиббий ёрдам кўрсатади. Бу ҳақда ССВ матбуот хизмати хабар берди.
Тошкент шаҳар тез тиббий ёрдам станцияси Call-маркази бўлим бошлиғи Насиба Маҳмудованинг маълум қилишича, пандемия шароитида аҳоли тез ёрдам хизматига ҳар қачонгиданда кўпроқ эҳтиёж сезмоқда.
Маълумотларга кўра, 2022 йил 1-18 январь кунлари пойтахт 103 хизматига жами 78 771 та чақириқ келиб тушган. Шундан тана ҳароратининг кўтарилиши бўйича 23 335 та, коронавирусга гумон қилинган, касалликка чалинган ва бошқа юқумли касалликлар билан 2632 та мурожаат қайд этилган.
Сўнгги 5 кун ичида шаҳар 103 хизматига бўлаётган чақириқлар сони кескин ошиб, кунлик ўртача 5200-5300 тани ташкил қилмоқда. Таъкидланишича, январь ойи бошида бу рақам 3200-3400 тадан иборат бўлган.
«Кейинги кунларда тез ёрдам хизматига умумий чақириқлар сони ортгани сабабли шаҳар тез тиббий ёрдам станцияси Call-марказига пойтахтнинг 12 туманида жойлашган марказий поликлиникалардан мутахассислар жалб этилиб, чақириқларни саралаш тизими йўлга қўйилди.
Унга кўра, эндиликда 103 хизматига мурожаат қилган беморнинг шикоятлари тингланиб, агар унинг аҳволи енгил бўлса, бириктирилган ходимлар чақириқни ўз ҳудуди бўйича оилавий поликлиникаларга йўналтиради. Шундан сўнг мурожаат қилган беморга поликлиниканинг мобил бригадалари томонидан тез тиббий ёрдам кўрсатилади. Оғир аҳволдаги беморлар эса тез ёрдам хизмати билан қамраб олинади», — дейди Насиба Маҳмудова.
Шунингдек, январь ойида тез ёрдам бригадалари томонидан коронавирус аниқланган ва аҳволи енгил фуқароларга уйда даволанишлари учун вирусга қарши дори-дармонлар бўлган COVID-box'лар бериш ҳамда касалликка гумон қилинган шахслардан экспресс-тест олиш ҳам йўлга қўйилган.
Чақириқлар сони ортгани ва иш юкламаси кўпайиб бораётгани сабабли куни кеча шаҳар 103 хизмати тасарруфига Соғлиқни сақлаш вазирлиги томонидан қўшимча 40 та замонавий жиҳозланган тез тиббий ёрдам машинаси ҳайдовчилари билан бирга бириктириб берилди. Шунингдек, Call-марказ иш самарадорлигини ошириш учун 30 та янги оператор ўрни яратилган.
Эслатиб ўтамиз, 2021 йилнинг февраль ойида Абдулла Азизов Ўзбекистонда тез тиббий ёрдамнинг бир марталик ташрифи ўртача 150 минг сўмга тушиши ҳақида айтган эди. Май ойида эса Республика шошилинч тез тиббий ёрдами илмий маркази бош директори Даврон Тўлаганов 2021 йилда битта тез тиббий ёрдам чақириғи учун 7700 сўмдан маблағ ажратилганини таъкидлаганди.
Изоҳ (0)