Навоий вилояти Навбаҳор туманида ўзининг фидойилиги, меҳнатсеварлиги билан ўқувчиларга таълим ва тарбия бериб келаётган икки нафар ўқитувчига президент совғаси сифатида Cobalt автомобили совға қилинди, деб хабар беради Халқ таълими вазирлиги.
Таъкидланишича, автомобиль совғаси топширилган 1-мактабнинг физика фани ўқитувчиси Соҳиба Наврўзова ҳамда 20-мактабнинг география фани ўқитувчиси Обиджон Сайдаҳметов ўз фаолиятлари давомида юзлаб битирувчиларни олий таълим муассасаларига ўқишга киришига ҳисса қўшган.
«Хусусан, Навбаҳор туманида ўтган 2021 йил битирувчиларининг 76,6 фоизи олий таълим муассасаларига қамраб олингани ҳам ўқитувчиларимизнинг яратиб берилаётган имкониятлардан кенг фойдаланган ҳолда ўқувчиларга юқори сифатда таълим бераётганидан далолатдир. Айтиш жоизки, ўқитувчиларга берилаётган бундай эътибор соҳадаги ислоҳотларни янги босқичга кўтаришда ўзига хос мотивация бўлиб хизмат қилади», — дейилади хабарда.
Эслатиб ўтамиз, 2021 йилнинг мартида Намангандаги мактабга 75 километр масофадан қатнаб дарс берадиган ўқитувчига поездда бепул қатнаш имконияти берилган эди. Шунингдек, таъкидлаш керакки, ўқитувчи бошқа туманга ишлаш учун борганига 50 фоиз, бошқа вилоятга борганига эса 100 фоиз устама ҳақ тўланиши белгиланган. Қўшимча тўланиши фақат олий ва биринчи тоифали ўқитувчиларга тааллуқли.
Аввалроқ ХТВ мактабларда география фани соатлари қисқараётганига оид эътирозларга муносабат билдиргани, Ўзбекистон мактабларида энди жисмоний тарбия фани ҳафтасига 2 соатдан ўқитилиши тўғрисида хабар берилганди.
Изоҳ (0)