Тошкент вилояти Янгийўл шаҳрида 15 январь куни спиртли ичимлик ичиш оқибатида келиб чиққан жанжалда бир киши пичоқланди. Бу ҳақда Тергов департаменти хабар қилди.
Қайд этилишича, шу куни соат 15:30 атрофида Райҳон кўчасида яшовчи Р.К. (1966 йилда туғилган) ўз уйида у билан вақтинча ижарада яшовчи таниши А.В. (1982 йилда туғилган) билан спиртли ичимлик истеъмол қилган. Бу орада ўрталарида жанжал келиб чиққан. Шунда Р.К. ошхона пичоғи билан А.В.нинг ўнг томон қорин қисмига бир марта уриб, тан жароҳати етказган.
Оқибатда А.В. олган тан жароҳати билан шаҳар тиббиёт бирлашмасига ётқизилган.
Воқеа жойига тергов-тезкор гуруҳи етиб бориб, кўздан кечириш вақтида қонга ўхшаш доғлар ҳамда бир дона ошхона пичоғи ашёвий далил тариқасида расмийлаштириб олинган.
Тергов жараёнида аниқланишича, ҳолатга уй эгаси Р.К. таниши 40 ёшли А.В.ни камситиб, уни уйи ва яқинлари йўқлиги тўғрисида айтган гаплари унга ёқмагани сабаб бўлган.
Ҳолат юзасидан Жиноят кодексининг 104-моддаси 2-қисми «л» банди (қасддан баданга оғир шикаст етказиш) билан жиноят иши қўзғатилган. Р.К. жиноят ишида гумонланувчи тариқасида жиноят ишига иштирок этишга жалб қилиниб, процессуал тартибда ушланган. Ҳозирда жиноят иши юзасидан дастлабки тергов олиб борилмоқда.
Изоҳ (0)